Aningaasaateqarfik Sermeq ukioq manna qinnuteqartorpassuarnut agguaalerpoq. Kulturimik siuarsaaneq pillugu siunnersuisooqatigiinnit aningaasat agguaanneqarnissaat akuerineqarpoq, kommunillu tungaaniit aningaasanik kommunimi eqqumiitsuliortunut kulturilerisunullu tapiissuteqarneq nuannaarutigineqarpoq.
Kulturimut immikkoortitsisarnermik isuma tassaavoq kommunip kulturimut politikkianut aamma illoqarfiit pingaarnersaannut periusissiamut tapersiinissaq kiisalu innuttaasut kulturimik neqeroorutinik arlalinnik neqeroorfigineqarnissaannik qulakkeerineq. Kommuneqarfik Sermersooq kommuniussaaq eqeersimaartuartoq, tassani kulturi eqqumiitsuliornerlu ingerlalluarfiulluni pisoq. Kulturimik siuarsaaneq pillugu siunnersuisooqatigiinnit pingaartinneqarpoq, ilaatigut ullutsinni kalaallit eqqumiitsuliortuisa aningaasanik tapiiffigineqarnissaat, innuttaasut ulluinnarni eqqumiitsuliornermik kulturimillu takusaqarnissaat kiisalu kommunimi inoqarfippassuit akornanni ikaartarfiliornissaq.
Kulturimik siuarsaaneq pillugu siunnersuisooqatigiinnit qinnuteqartorpassuarnut 2,5 mio. kr.-it agguaanneqarput. Aningaasaateqarfiup Sermeq-p ukioq manna ilaatigut tapiiffigisai tassaapput:
- Tasiilami Kulturikkut paarlaasseqatigiinneq
- Sermersuumi Nipilersornermik Ilinniarfiup Paamiuni Tasiilamilu immikkoortuisa akornanni nipilersornermik paarlaateqatigiinneq
- Sermersuup nipilersornermik ilinniarfianit nipilersornermik ilinniartitsisut marluk Ittoqqortoormiini workshoppertitsinerat
- Nuuk International Film Festival 2023.
Ukioq manna kulturimut suliniutit 30-ngajaat tapiiffigineqarnissaminnik qinnuteqarsimapput. ”Tamanna kommunimi tamarmi sulerusussuseqartoqarneranik uppernarsaavoq, aamma namminneq piumassutsiminnik sulerusuttorpassuaqartoq kommunimi innuttaasorpassuit kulturimik neqeroorfigineqarnissaannik tunniussaqarusuttunik. Kommune innuttaasut kulturimik eqqumiitsuliornermillu piumasaannik tunniussaqarnissaminik iluatsitsissappat taava namminneq piumassutsiminnik suliumasunit nukiit pigineqarnissaat apeqqutaalluinnartuuvoq, kommune peqatigalugu suliassamik taassuminnga suleqatiginnillutik kivitsisunik. Tamanna kommunitut assorsuaq pingaartitaraarput.”, Borgmesteri, Avaaraq Olsen, oqarpoq.