Multihalimik ingerlatsinissamut isumaqatigiissutaasimasoq atuukkunnaarpoq. Taamaattumik 2023-mi juulip ulluisa aallaqqaataannit kommunip halimik ingerlatsineq tigussavaa.
Inussivik kommunimit pigineqareerpoq, taamaattumillu ingerlatsinermik tigusineq pissusissamisoorluinnarpoq. 2023-mi juulip ulluisa aallaqqaataannit Susassaqartitsinermut Immikkoortortap Inussiviup siunissami ingerlanneqarnissaa isumagilissavaa. Hali illoqarfimmi innuttaasunit atorneqarluartoq, timersorfittut, qinersiffittut, niuffaffittut piffissamilu kingullermi coronap nalaani misissuivittut akiuussusersuiffittullu atorneqartarpoq.
Naak ingerlatsineq kommunimit ingerlanneqaleraluartoq, kommunimit halimi sammisarineqartut ajoquserneqaratik ingerlaannarnissaat sulissutigineqassaaq. ”Innuttaasut imaluunniit multihalimik atuisut kommunip ingerlatsinermik tigusineranit sunnerneqarnissaat naatsorsuutiginngilarput. Halimik atuisut sammisaminnik ingerlatsiinnarnissaannik qulakkeerinissarput qilanaaraarput”, Peqqinnermut Susassaqartitsinermut fagchefi Frederik Lundblad oqarpoq.