Ullumikkut ulloq FN-imit Nunani Tamalaani Ilaqutariinnut ulloritinneqarpoq. Tamanna Godthåbhallimi Kommuneqarfik Sermersuumit malunnartinneqarpoq illoqarfimmi innuttaasut tamarmik ilaqutariinnut tamanut ataatsimuualaartinneqarnissaannut sammisaqartinneqarnissaannullu aggersarneqarlutik. Ilaatigut pissittaarfeqartitsisoqarpoq, sumobrydningimik paasuusaartitsisoqarpoq, qalipaatitsisoqarpoq, nipilersukkanik aliikkusersuisoqarpoq isiginnaartitsisoqarlunilu.
Ilaqutariit pitsaasumillu ilaqutariittut inuuneqarnissaq kommunimi sulinermi assut initupput aamma meeqqeriviit, atuarfiit sunngiffimmilu sammisaqarnerit pitsaanerusut kommunalbestyrelsimit annertuumik iliuuseqarfiginiarneqartarlutik.
Ilaqutariit ulluanni borgmesteri Avaaraq Olsen tikilluaqqusivoq ilaatigullu ima oqaaseqarluni:
“Amerlasuunut ilaqutariittut inuuneq ulluinnarni inuunermut ilaavoq annertooq nalinginnaasorlu, kisiannili aalajangerpunga, Kommuneqarfik Sermersuumi Ilaqutariit ulluat, immikkuullarilluinnartuusoq, malunnartissagipput.
Inuuninni ilaqutariit suussusaat allannguuteqarsimaqaaq. Meeraalluta ataatatut, anaanatut meeqqatullu pinnguartarsimavugut ullumikkulli meeqqat anaanatut, anaanatut meeqqatullu pinnguarsinnaalluarput. Imaluunniit ataatatut, ataatatut meeqqatullu. Immaqaluunniit allarluinnarmik
Ilaquttatit qanorluunniit isikkoqaraluarpata, ullumikkut qaaqqusaavutit, ilaqutariinneq nuannaarutigerusukkatsigu kiisalu ilinnut ilaquttannullu nuannersumik pisoqarfiusumillu ulloqartitserusukkatta.”
Peqataasunut tamanut qujanaq. Neriuppugut ilaquttasilu peqatigiillusi ullorsiorluarsimassasusi.
Assiliisartumit ilaqutariittut assilitippisi? Assilitinnersi nassaareriarlugu kanani ataani assiliisarfimmiit assersi aasinnaavarsi.
