Nuummi atuarfik nutaaq ulluuneranilu paaqqinnittarfik Nuummi illoqarfiup qeqqani inissisimapput sanaartornerlu naammassiartuaarneqarpoq. Taamaattumik Kommuneqarfik Sermersooq aternik unammisitsivoq, illillu aternik siunnersuuteqarsinnaavutit. Akissarsiassartaqarpoq.
Atinik unammisitsineq maajimi aallartinneqassaaq. Tassani kommunimi innuttaasut TAMARMIK atimik siunnersuuteqarsinnaapput. Kommunip innuttaasut tamarmik suliap ingerlanerani peqataatinneqarnissaat kissaatigivaa, taamaalilluni kikkut tamarmik tusaaneqarnissaminnut periarfissaqartinneqarput. Atuarfik Nuup ilisarnaatigilissavaa nutaaq, tassani ilikkagaqarnissaq ineriartornissarlu inerisinneqassapput. ”Assorsuaq tulluusimaarutigivarput Nuummi nutaamik atuarfittaassagatta atuartuutitta ilikkarnissaminnut pisariaqartitaannik naammassinnittumik. Atuarfik atortorissaaruteqassaaq nutaaliaasunik, pinngorartitsinermi ilikkagassanut ikorfartuisunik. Pilersaarut annertoorujussuuvoq taamaattumillu kommunimi innuttaasut tamaasa ikiortiserivavut atuarfittaassap atissaanut sunniuteqaqataaqqullugit”, Atuarfeqarnermut fagchefi, Riikki Grønvold, oqarpoq.
Atinik unammisitsineq immikkoortunut arfinilinnut agguataagaavoq:
1. Atinik unammisitsineq:
Atinik unammisitsineq Kommuneqarfiga-mi aamma taasivissat karsit atorlugit ingerlanneqassaaq, taasiviit ukunani inissinneqassapput: Atuarfik Ukaliusaq (USK), Atuarfik Samuel Kleinschmidt (ASK), AKO Illu aamma AKO Narsarmiutaq kiisalu Nuummi Kommuneqarfiup Allaffiani innuttaasunik kiffartuussivimmi. Atimik siunnersuuteqarnissamut killigitinneqarpoq ulloq 8. juuni. (Siunnersuutit facebookikkoortinneqartut unammisitsinermi ilanngunneqassanngillat.)
2. Toqqaaneq:
Meeqqerivimmut aamma atuarfimmut aqqit 10-t siunnersuutigineqartut immikkut ittumik ataatsimiititalianit marlunnit misissorneqassapput.
3. Taasititsineq:
Aqqit siunnersuutigineqartut Kommuneqarfiga-mi taaneqarsinnaasunngortinneqassapput. Tassani innuttaasut tamarmik atimik nuannarisaminnik digitalimik taasinissaminnut periarfissaqarput. Taasinermut ulloq 15. juuli killiliunneqarpoq.
4. Meeqqanut Atuarfeqarnermullu Ataatsimiititamut inassuteqarneq:
Atuarfimmut aamma ulluunerani paaqqinnittarfimmut siunnersuutit sisamat, nittartakkami taaneqarnerpaat, Meeqqanut Atuarfeqarnermullu Ataatsimiititamut inassutigineqassapput.
5. Politikerinit siunnersuutit marluk ajugaasut toqqarneqassapput:
Ulloq 2. aggusti Meeqqanut Atuarfeqarnermullu Ataatsimiititap siunnersuutini atuarfimmut aamma ulluunerani paaqqinnittarfimmut atissatut ajugaasut sorliit marluk isummerfigissavai, tamannalu matoqqasumik oqaluuserisaqarnikkut pissaaq.
6. Tamanut atinik saqqummiussineq:
Aqqit aggustip ingerlanerani tamanut saqqummiunneqassapput.
Siunnersuut toqqarneqartoq akissarsisinneqassaaq inoqutigiit imaluunniit atuaqatigiit tamakkerlugit Katuaq-mi filmernissamut billetsinik. Atinik unammisitsinermi ajugaasoq tassaassaaq siunnersuuteqartup taaguutissamik siunnersuutaanik aggustip qaammataani Meeqqanut Atuarfeqarnermullu Ataatsimiititami politikkikkut taasinermi ajugaatinneqartoq. Siunnersuuteqartut arlallit siunnersuutaat assigiissappata assigiit akornanni makitsisoqassaaq. Siunnersuutigineqartoq ajugaasoq Nuup avataaneersuussagaluarpat, taanna taamaaqataanik akissarsisinneqassaaq. Maaji naatinnagu siunnersuutit nassiuguk illoqarfiullu qeqqani “uummateqarfiup” nutaap atserneqarnissaanut unammisitsinermut peqataallutit. Kommunimi aggustimi aqqit saqqummiunneqarnissaannut qilanaarpugut.
Atinik unammisitsineq – Nuummi atuarfik nutaaq ulluuneranilu paaqqinnittarfik atserneqassapput