Innuttaasunut

Uummateqarfik ammarpoq – Innuttaasunut angerlarsimaffeqanngitsunut aamma atugarliortunut ornittagaq nutaaq

Kommunimit aamma  Aqqusinermi ujartuilluni angalaartartunit ilisimaneqalerpoq Aqqusinermi ujartuilluni angalaartartut innuttaasunik ataatsimeeqatigiiffiusinnaasumik pisariaqartitsisoqarsimasoq. Innuttaasup Aqqusinermi ujartuilluni angalaartartunit qulaajaaffigineqarnissamut periarfissaqarnissaa siunertaavoq. Ilutigalugu ornittagaq inooqataanermut ataatsimut sammisassaqartitsinernut sinaakkusiissaaq.

Uummateqarfik innuttaasunut atugarliortunut angerlarsimaffeqanngitsunullu ulluinnaat ingerlannissaannut ikiorneqarnissamik pisariaqartitsisunut ikiorsiissutaassaaq. Ornittagaq nal. 09:00 – 14:00-illu akornanni ammasassaaq. Tassani Aqqusinermi ujartuillutik angalaartartut attaviginissaanut periarfissaqartassaaq. Taassuma saniatigut ornittagaq assigiinngitsunik periarfissaqassaaq soorlu iluameertumik uffarfik, atisassamaatit errortat, killortinneq ilaatigullu angerlarsimaffeqanngitsunut unnuisarfimmut piumasaqaatinik naammassinnittunut ajornartoornermi unnuisarfik.

”Innuttaasunut angerlarsimaffeqanngitsunut atugarliortunullu ornittakkamik pilersitsisimanerput nutaarsiassatut nuannersutut isigaara. Inuit inuiaqatigiinni ajornartorsiortut inissisimanerisa paasinissai ajornarsinnaasarpoq. Ulluinnarni uffarnissamut imaluunniit nujalerisumukarnissamut periarfissaqarnerup isumaa puigorsinnaasarparput. Ajoraluartumik kikkut tamarmik taamatut periarfissaqanngillat kisiannili massakkut periarfissaqalerput Uummateqarfiup pilersinneqarneratigut,” Suliffeqarnermut Isumaginninnermullu Ataatsimiititami siulittaasoq Inge Olsvig Brandt oqarpoq.

Nangilluni oqarpoq: ”Aqqusinermi ujartuillutik angalaartartut aammalu ikiorsiissutigisavut innuttaasunut atuisunut annertuumik allannguuteqartitsisuupput. Isiginngitsuusaarutsigit allamut sangunissaq aarlerinarsisissavarput. Aqqusinermi ujartuillutik angalaartartut sulinerat allanngueqataasorujussuuvoq. Innuttaasut ulluinnaani isumaqalertitsisinnaagutta neriuuteqalersitsisinnaaguttalu ajugaasimaarneruvoq. Allatut oqaatigalugu suliniuterput pinaveersaartitsinertut sunniuteqassaaq.”

Aqqusinermi ujartuillutik angalaartartut ornittakkamiinnerannut atatillugu innuttaasut iliuusissatut pilersaarusiorfigineqassapput Aqqusinermi ujartuillutik angalaartartunit ikorfartorneqarnissamut, aqqutissiuunneqarnissamut tapersersorneqarnissamut malitseqartinneqarnissamullu periarfissaqassallutik tamannalu Kommuneqarfik Sermersuumi angerlarsimaffeqanngitsunut aamma inuuniarnermikkut ajornartorsiuteqartunut tamakkiisumik isumaginninnikkut sullissinissamut ilaatinneqarpoq. Tassunga ilanngullugu kommunip tungaaniit kommunimi innuttaasunut angerlarsimaffeqanngitsunut inissianik misiligutinik suliniuteqarneq isumaqatigiissutigineqarpoq.