Innuttaasunut

Nuuk Imeq: Maanna sulisut ukkatarineqassapput

Nuuk Imermi siulersuisut aalajangerput suliffeqarfiup aqutamik matuneqarnissaa aallartinneqassasoq, taamaalilluni nioqqutissiorneq ukiup nikinnerani unittussanngorlugu. Aningaasaqarnermut Inuussutissarsiornermullu Ataatsimiititap sisamanngornermi matoqqasumik ataatsimiinnerani piginneqataassutinik amerlanerpaanik piginnittup, Kommuneqarfik Sermersuup, tamanna akuersissutigaa.

”Soorunami kommunitsinni suliffeqarfinnik matusineq uatsinnut nuannersuunngilaq, taamaattumillu tunngavilersuutigiuarsimavarput maannakkut utertitsisarnermi periuserineqartoq attatiinnarneqassasoq, kisianni allat assigalugit Inatsisartut aalajangernerannut nakkaannartariaqarpugut, Kommuneqarfik Sermersuumi borgmesteri Avaaraq Olsen oqarpoq.

”Piginnittutut qulakkiissavarput, sulisut 50-it missaanniittut sulinermik inuussutissarsiuteqarnerminni pitsaasumik ingerlaqqinnissaat. Sulisut pikkorissut pineqarput piginnaasaallu iluatigineqarluarlutik, kisianni amerlanerit qularnanngitsumik pilertortumik suliffittaassagaluartut, sutigut tamatigut ikiorneqarnissamik neqeroorfigineqassapput”, Avaaraq Olsen oqarpoq.

Nuuk Imermi siulersuisut taakkuupput aalajangiisut, soraarnissamut aaqqiissutit suut sulisunut pineqartunut atuutsinneqassanersut, kisianni kommune suliassamut tunngatillugu ikiuunnissaminut neqerooruteqareerpoq.

Ukioq manna Kommuneqarfik Sermersooq 20 millioner kroninik Nuuk Imermit iluanaarutinik pissarsivoq. Pissarsiarineqartartut 2025 ilanngullugu ingerlaqqissapput, tamatumalu kingornagut suliffeqarfik pilersaarutit naapertorlugit matuneqavissaaq.

”Soorunami uggornarpoq kommunip karsiani isertitassanik annaasaqarnissaq, kisianni qujanartumik ukiut arlallit isertitaqaatissanik allanik ujarlernissamut periarfissaqarpugut”, Avaaraq Olsen oqarpoq. 

Nuuk Imermi siulersuisut ingerlaannarnissaq aalajangersimasuuppassuk, Kommuneqarfik Sermersuup piginneqataassutini allatut ajornartumik tuniniartariaqassavai. Kommunit piginnaatitaaffiat naapertorlugu, kommunit suliffeqarfinnut namminersortunut unammillersinnaatitaanngillat.