Sanaartornermut Avatangiisinullu Ingerlatsiviup ilimasaarutigaa Nunaminertanut Sanaartornermullu Oqartussaaffeqarfiup maannamit aalajangiinerit e-Boksikkut nassiuttalissagai. Suliat pillugit attaveqaqatigiinnerit massakkutulli ingerlaannassapput.
Digitalikkut attaveqaqatigiinneq suliffeqarfinnut suliniaqatigiiffinnullu anginerusunut annertuumik sunniuteqarsinnaavoq. Tassunga e – Boksip suliniaqatigiiffiit ataasiakkaat CVR – normuinut attuumassuteqarnera peqqutaavoq. Tamanna tunngavigalugu kommunimit kajumissaarutigineqarpoq suliniaqatigiiffiup iluani allakkanik agguaassisarneq eqqumaffigineqassasoq taamaaliornikkut aalajangiiffigineqarnerit nassaarineqarsinnaaniassammata.
Aalajangiinerit suliniaqatigiiffiup iluani eqqortumut apuunnissaanut tunngatillugu kommunip tungaanniit ikiuunnissamut piareersimasoqarpoq. Eqqumaffigeqquneqarporli suliffeqarfiit suliniaqatigiiffiillu ataasiakkaat iluminni aalajangiinerit pillugit agguataarineq tamakkiisumik nammineq akisussaaffigimmassuk.
Sulinermik ajornaallisaanissamut pitsanngorsaanissamullu umiatsianut Containerinullu akuersissuteqarnermut tunngatillugu Kommuneqarfik Sermersooq assingusumik digitalikkut aaqqiissuteqarnermik atulersitsinikuuvoq. Aalajangiinerit e – boksikkut digitalikkut allannguiffigineqarneratigut innuttaasunut, suliffeqarfinnut/suliniaqatigiiffinnut kommunimullu taamatulli pitsaasumik sunniuteqarnissaa naatsorsuutigineqarpoq.
Tamanna tunngavigalugu kommunip innuttaasunut suliffeqarfinnullu kajumissaarutigaa pisortanit digitalikkut allakkat eqqumaffigineqarnissaat taamatuttaarlu e – boks akulikitsumik takuneqartarnissaa.