Piorsarsimassuseq

Kulturisioqatigiinneq Issittormiut ataatsimoorfiat

Maajip 25-anit 28-anut Nunat Avannarliit Nuummi kulturisioqatigiinnerat ingerlanneqassaaq, aaqqissuussinerit pissanganartut arlallit malinnaaffigisinnaasat qilanaartuutissaapput. Kulturisioqatigiinnermi tusarnaartitsinerit, saqqummersitsinerit aamma oqallinnerit misigisassarsiorfiusinnaapput.

Nunat Avannarliit Nuummi kulturisioqatigiinneranni Nuup Nunani Avannarlerni aamma Issittumi kateriffiunissaa qilanaaraarput, ukioq manna qulequtaq tassaassaaq “unity – ataasiussuseq” imaluunniit “ataqatigiinneq”. Kangianit, kitaanit kujataanniillu tikeraanit orninneqassaagut. Samit eqqumiitsuliortut Skandinaviap avannarpiaanit Canadami Nunavut-mit angalaqatigiinnut aamma nunanit avannarlernit issittumilu kulturikkut ataatsimooqatigisavut allat amerlasuut tikerassapput.

Kulturisioqatigiinneq pisoqarfiulluartoq ingerlanneqassaaq Kalaallit Nunaata issittumit nunaniillu avannarlernit pitsaanerpaat ataatsimooqatigiiffimmi katersuutsippagit, taamaalilluni aamma ukioq manna sammisamut naapertuuttumik ingerlatsisoqassaaq. Ukioq manna kulturisioqatigiinnermi sinaakkutissatut toqqakkamik ingerlatsinermut atasumik isumassarsioqatigiinneq ilinniarfigeqatigiinnerlu isumatusaarneruvoq. Eqqumiitsuliornerup, atuakkiornerup, ilisimatusarnerup aamma oqallinnerit assigiinngitsorpassuit qitiutillugit aaqqissuussisoqassaaq.

”Ukioq manna ilaatigut Silamiut, Rasmus Lyberth aamma Kimmernaq tusarnaartitsissapput, Julie Edel Hardenberg saqqummersitsissaaq, isiginnaartitsissutit ”Isikkivik” aamma ”Palasi aamma Angakkoq”, oqallinnerit, oqalugiarnerit allarpassuillu misigineqarsinnaassapput. Aaqqissuunneqartussat ingerlaavartumik saqqummiuttassavagut aamma qilanaarutissaqaqaaq!” pikialaartitsinerni aqutsisoq Jonas L. Nilsson oqaluttuarpoq. 

Kommuneqarfik Sermersuumit nuannaarutigineqarpoq Nuuk tassaassammat eqqumiitsuliortut, atuakkiortut, ilisimatusartut  kulturikkullu nuimasut allat katersuuffigissammassuk. Kommuneqarfik Sermersuumi borgmesteri Avaaraq S. Olsen oqarpoq: “Nuannaarutigaara illoqarfitsinni innuttaasut periarfissinneqarmata kulturikkut misigisassarpassuarnut assigiinngitsunut. Nuuk Issittumi katersuuffiunera tulluusimaarnaqaaq, issittormiut nunallu avannaamioqatigiit kulturii naapisinneqarsinnaallutik.”

Allanik naapitsinitsinni uagut immitsinnut soorluttaaq nunarsuaq sinnerlugu ilikkagaqarnerusarpugut. Taamaattumik Nunat Avannarliit Nuummi kulturisioqatigiinnerannut Nuuk ilinnik tikilluaqqusivoq. Pikialaartitsineq tamaat peqataaffiginiaraanni ima akeqarpoq: Inersimasut 350 kr., Meeqqat 12-18-it akornanni ukiullit 175 kr., meeqqanut 12 ataallugit ukiulinnut akeqanngilaq.

Pikialaartitsineq pillugu annermik uani atuagaqarsinnaavutit aamma tassani billitsinik pisisinnaavutit:  Saqqaa — Nuuk Nordisk