Nuummi qatserisartut ukiup affaata ingerlanerani atortut elektroniskiusut unnuami immiisinneqarnerata kingunerisaanik ikuallattunik pingasunik nalunaarsugaqarput. Qatserisartunit nalunaarut ersarippoq. Sinitsillutit atortutit elektroniskiusut immiisinngisaannakkit. Inuunermik naleqarsinnaavoq.
Sinitsilluni oqarasuaat angallattagaq, powerbanki imaluunniit alla elektronikki immiisissallugu ajornanngilaq iluarlunilu. Kingunerisassaali ajornerpaaq tassaasinnaavoq iteqqinngittoorsinnaaneq. Nuummi qatserisartut ukiup affaata ingerlanerani ikuallattunik pingasunik nalunaarsuipput, tamarmik najugaqartut unnuami sininneranni elektronikkinik immiisitsinermik peqquteqartunik. Kingulleq Nuummi Tuapannguani inissiami pivoq. Qujanartumik ajoqusertoqanngilaq.
”Sofa imaluunniit siniffik ikuallajasuutut isigineqarpoq taamaattumillu ikuallajasuararsuupput. Elektronikkit qipiup imaluunniit akitsip ataani immiisinneqartoq kissarujussuartarpoq ajornerpaamilu ikuallannermut peqqutaasinnaalluni” Kommuneqarfik Sermersuumi upalungaarsimanermi pisortaq Jes Damgaard Andersen oqarpoq.
Putsumut kalerrisaarut inuunermut sillimmataavoq akikinnerpaaq.
Inissiani tamani qitiusumik inissisimasumik ikinnerpaamik ataatsimik putsumut kalerrisaaruteqartariaqarpoq. Inissiat anginerusut amerlanerusunik putsumut kalerrisaaruteqartariaqarput angerlarsimaffimmi assigiissaakkamik agguataarsimasunik. Putsumut kalerrisaarut inuunermik annaassisinnaavoq. Toqqissilluni sinikkaanni piffissami eqqortumik ikuallattumik naammattuuinissaq qulakkeerneqarsinnaanngilaq. Taamaattumik putsumut kalerrisaarut inuunermut sillimataasinnaavoq akikinnerpaaq immaqalu aamma pingaarnerpaaq pigineqarsinnaasoq. Danmarkimi qatserisartut ukiumut ikuallattunut 3.500-t missaaniittunut orniguttarput. Ikuallattoornerit 10%-ii elektronikkinut imaluunniit atortulersuutinut attuumassuteqarput.
”Putsumut kalerrisaaruteqaraanni sillimalluni sinittariaqanngilaq. Unnuami najugaqartunit arajutsineqartumik ikuallattoqalernerani inneq sukkasoorujussuarmik siaruaassinnaasarpoq. Taamaattumik angerlarsimaffinni tamani putsumut kalerrisaarut pinngitsoorneqarsinnaanngilaq.” Jes Damgaard Andersen oqarpoq.
Isumannaatsumik immiisitsinissamut siunnersuutit
Jes Damgaard Andersen elektronikkimut ikuallattoornissamullu sillimanermut tunngasunik ersarissunik siunnersuuteqarpoq:
- Unnuakkut elektronikkiutit immiisinngisaannaruk.
- Innaallagissiutit akornuteqanngitsut kisiisa atukkit.
- Elektronikkit ikuallajasuumut soorlu ass. siniffimmut sofamulluunniit ilinngisaannakkit.