Innuttaasunut

Oqilisaassivik nutaaq Nuummiittoq ammarneqarpoq

Inge Olsvig Brandt, Suliffeqarnermut Isumaginninnermullu Ataatsimiititaliami siulittaasoq aammalu oqilisaassivimmi nutaami Kammagiinni aqutsisoq Marie Grønvold, ataasinngormat martsip 20-anni ammaanersiortitsipput. Kammagiit siunissami innuttaasunut 18-iniit 65-inut ukiulinnut atorneqartarumaarpoq, innuttaasut pisariaqartitsisut qanigisaallu pisariartitsineranni.

Kommuneqarfik Sermersooq kissaatigisarsimavaa, innuttaasunut immikkut pisariaqartitsisunut qanigisaasunullu oqilisaassiveqalernissaq. Maanna tamanna piviusunngorpoq, oqilisaassivik nutaaq Nuummi ammarneqarmat, taannalu Kissarneqqortuunnguani Kammagiinni inissisimavoq. Qaammatit marluk kingulliit init piareersarneqarnerannut atorneqarput, taamaalilluni oqilisassivimmik nutaamik pilersitsinissamut piumasaqaatit tamarmik anguneqarsimalerlutik. Taamaattumik ullormi ammaanersiorfiusumi matut ammarneqarlutik tikilluaqqusisoqarmat nuannaffiuvoq. Ammaanersiortoqarmat erinarsortoqarpoq, takornariartitsisoqarluni, Inge Olsvig Brandt oqalugiarpoq allanillu pisoqarluni.

Marie Grønvold Kammagiinni aqutsisuusoq nuannaarluni orniguttut tikilluaqquai.

”Oqilisaassivimmut matut kiisami ammarsinnaanngoratsigit nuannaarpugut, manna innuttaasunut pisariaqartitsisunut toqqissisimanartumik najorneqarsinnaasussaavoq. Immikkut pisariaqartitsisutut inissisimagaluaraanni toqqissisimanartumik allanngorarpallaanngitsumillu ulluinnaqarnissaq pisariaqarpoq, oqilisaassivimmilu tamanna neqeroorutigisinnaanngorparput”, Marie Grønvold oqarpoq.

Politikkeriniit pingaartinneqarsimavoq innuttaasunut pisariaqartitsisunut qanigisaasunullu oqilisaassivimmik pilersitsinissaq. Oqaaseq ”oqilisaassivik” nuanninngitsumik isigineqarsinnaasaraluartut Inge Olsvig Brandtip allatut isigerusuppaa.

”Taassunga taarsiullugu innuttaasunut nutaanik pingaartunillu ataatsimoorfiusinnaasutullu eqqartorneqarsinnaavoq. Tamatta ataatsimoorfeqarnissatsinnik pisariaqartitsivugut, qanigisatsinni avataatungaanilu – sumiiffik inunnik naapitsivik toqqissisimanartumik peqqissaartumillu isumaginniffiusinnaasoq”, Inge Olsvig Brandt oqarpoq.

Kammagiinni oqilisaassivik neqeroorutaavoq nutaajusoq, innuttaasunut pisariaqartitsisunut tulluarsagaasoq, init pingasut nalinginnaasumik aaqqissugaapput innuttaasunut angerlarsimaffippalaartutut toqqissisimaarfigisinnaasaat kiisalu ini ataaseq siniffimmik paaqqutarineqarfissatut atorneqarsinnaasoq kivitsissuteqartorlu innuttaasunut pitsorluttunut tulluarsagaasoq. Taamaattumik oqilisaassivik pisariaqartitsisunut tamanut inissaqartitsissaaq. Neqeroorut innuttaasunut 18-iniit 66-inut ukiulinnut neqeroorutaavoq. Qaammatit marluk kingulliit init piareersarneqarneranut atorneqarsimapput, taamaalilluni innuttaasunik ”tigusinissamut” piareersartoqarsimalluni.

”Init atortullu nutaat atorlugit, innuttaasunut pisariaqartitsisunut nukittuumik ataatsimoortitsisinnaalernissarput naatsorsuutigaarput”, Marie Grønvold oqarpoq.

Oqilisaassiviup inissisimaffia iluaqutaasa ilagaat sammisassaqartitsivimmut atanera.

”Neriuutigaara atuisussat sammisassaqartitsivik atorluarumaaraat, taamaalillutik maani periarfissarititaasut iluaqutigissagaat. Ataatsimuussusermik misigissusermik pingaartitsinerput annerulissaaq inuit amerlanerusut takkuttalerpata”, Inge Olsvig Brandt oqarpoq.