Innuttaasunut

Nuuk Snow Fest 2023 aallartippoq

Ullumi martsip aappaanni apummik ilusilersuineq Nuuk Snow Fest aallartippoq, ilusilersuisullu iligiit 14-it qiimallutik ilusilersuinertik aallartippaat. Nammineq kajumissuseq atorlugu suleqataasut innuttaasullu malinnaajartortut aamma qiimapput. Assit uani takukkit.

Aaqqissuisut nalunaaqutaq qulingiluanut makitsipput ilusilersueqatigiit sorliit ilusilersugassaq sorleq ilusilersussaneraat, makitsisoqareermallu ilusilersueqatigiit sulillutik aallartipput.

”Ulloq manna sivisuumik qilanaarisimavarput, nuannerpoq takullugit ilusilersuisut nuannaartut malinnaajartortullu pissangasut. Neriuppugut qiimaneq ulluni tulliuttuni pingasuni ingerlaannassasoq. Innuttaasunut aamma assigiinngitsunik sammisassaqarumaarpoq”, taama oqarpoq suliniummut aqutsisoq ilorrisimaartoq, Alberte Parnuuna.

Borgmesteri Avaaraq Olsen nalunaaqutaq pingasunut oqalugiarluni Nuuk Snow Fest pisortatigoortumik ammarpaa.

”Apummik ilusilersuineq eqqumiitsulioriaasiuvoq, amerlanerpaartaasugut meeraanitsinniilli misilittarsimasarput. Illunnguusiortarpugut apummillu inuusiortarluta. Ilumoorlungalu oqassaanga, naammassinera suliassatullu takorloorsimasara assigiinngitsorujussuusarmata”, borgmesteri oqalugiaammini taama oqarpoq.

Ukioq manna Nuuk Snow Festertoqarnerani aammaarluni Nuup avataaniit peqataasoqarpoq. Ilaatigut nunatta avataaniit, Canadamiit peqataasoqarluni aammalu inuusuttuaqqat Paamiuneersut aamma ilusilersueqataajartorput.

”Misigisat eqqaamasallu Nuummi ataatsimoorfissatsinnik tunniussisarput. Ilami festivali kommunip tamarmiusup ataatsimoorfigisarpaa, akuttunngitsumik kommunitsinni suleqatigiinnik sumiiffinnit allaneersunik peqataasoqartarmat.”, Avaaraq Olsen oqarpoq.

Borgmesteri Avaaraq Olsen oqalugiareermat DJ Liam F. Rosbach nipilersorfik ammarpaa, kingusinnerusukkullu Miké Thomsen aamma nipilersorumaarpoq.

Ullut tulliuttut ingerlanerini inuusuttunut ilaqutariinnullu sammisassaqartitsisoqarumaarpoq aamma tusarnaartitsisoqassalluni, allarpassuarnillu aaqqissuisoqarumaarluni, soorlu nipilersortartoq savalimmiuneersoq HÚS aammalu SIGU tallimanngorpat nipilersussallutik. Nuuk Snow Fest ingerlanerani pilersaarutit uani nittartakkami takusinnaavatit.