Ukioq manna apummik ilusilersuisoqarnerani iligiit 15-it peqataapput, taakkunanut ilaallutik inuusuttuaqqat arfinillit klub Kalaaleq Paamiuneersut. Naak meeraagallaramik apummik inuusaliortarsimanissaat qularnanngikkaluartoq, aatsaavissuaq apummik ilusilersuinermik unammisitsinermut peqataapput, taakkulu oqariartuuteqarput.
Sapaammi seqinnarissuarmi nalunaaqutaq ullup-qeqqariartorpoq, inuusuttuaqqallu inersimasut ingiallortitik peqatigalugit apuk ilusilersugartik Nuup Saavani saqqummiunneqartussaq kusassarlugu ulapputigaat. Taakku Paamiuni klubbimiit Kalaalermiit peqataapput, apummik ilusilersuinermi Nuuk Snow Festimut qaaqquneqarsimagamik.
Iligiit Paamiuneersut suliartik naammasseqqissaarsimanngilaat, sunaanersorli ilusaatigut takuneqarsinnaavoq. Inuit sisamat nunarsuarput paarigaat. Iligiimmi takutikkusuppaat, nunarsuarput mingutsitsinermut silallu pissusiata allanngoriartorneranut illersorneqarnissaa pingaaruteqartoq.
”Isumassarsiorluareerluta ilusilersugassarput qanoq ittuussaanersut aalajangiupparput. Inuusuttuaqqat aperisimavagut suliorusunnersut, nunarsuarmut silallu pissusaanut tunnganissaanut oqariartuuteqarnissaanullu tunngassasoq inuusuttuarartagut isumaqarsimapput”, taama oqarpoq Sukisaarsartarfimmi Kalaalermi aqutsisut Thorine Sólheyg.
Nuuk Snow Festertoqarani ulloq kingullermut aqqut ajornanngitsuinnaasimanngilaq. Inuusuttuaqqat Paamiuneersut ukioq kingulleq Nuuk Snow Festertoqarnerani peqataasussaasimagaluarput, silarluppallaarnerani peqqutigalugu tikinngitsoorsimallutik. Ukioq manna peqataanissaat aamma ajalusooqqingajavippoq, silarlunnera peqqutigalugu ullormik ataatsimik kinguaattooqqaarlutik Nuummut apissipput.
Apummik ilusilersuisoqarnerata nalaani seqineq silagitsitsimmat Kommuneqarfik Sermersuup kitaamiortaanut iluatatsitsinngitsoorunanngilaq. Silaginnerali apummik ilusilersuisartunut pitsaavallaanngilaq, aput ilusilersuinerminni passutaat passutissallugu ajornarnerulerpoq, ilusilersukkallu ilaat uukkaattoorsimallutik.
Iligiit Paamiuneersunut apummik ilusilersuineq unammillernarsimavoq, taamaakkaluartoq nuannisarluarsimapput.
”Paamiuni sungiusarnissatsinnut periarfissaqarsimanngilagut silarloruttormat. Kisianni ilusilersugatta inernera naammagisimaarparput, pingaartumik eqqarsaatigalugu siullermeerluta peqataanerput”, ilusilersueqataasoq Anguteeraq taama oqarpoq.
Inuusuttuaqqat ulluni pingasuni, ullaarnganiit ualiup tungaanut ilaatigullu taarsereernerata tungaanut apummik ilusilersuisarsimapput.
”Pikkoreqaat. Apummik ilusilersuineq timimut sukataarnarpoq. Tamanna uatsinnut sakkortulaarsimavoq, inuusuttuaqqallu akornanni assortuutikujulaarnerit pisarsimapput, tamaakkaluartoq ulloq qungujulalluta naammassisarparput ullaakkullu aallarteqqikkaangatta qiimasarluta”, Thorine Sólheyg oqarpoq.
Festivalertoqarnerani Nuummi Katersugaasivimmi init ilaat isersimaartarfinngortinneqarsimavoq, peqataasut tamarmik kissassimaarfigisinnaallugulu neriffigisinnaasaat.
Ukioq manna Nuuk Snow Festertoqarnerani iligiit arlallit Nuup avataaneersut qaaqquneqarsimapput. Ilaatigut Canadamiit Paamiunillu aggertoqarluni, taakkulu angalanerat piviusunngorsinnaasimavoq Tapiissuteqartarfik Sermeq aningaasaliineratigut, kulturikkut suliaqarnermi nutaanik misileraaffiusunik pilersitsinissamut kulturimillu suliaqartut assigiinngitsut, namminersorlutik inuussutissarsiortut kommunimilu innuttaasut akornanni suleqatigiinnermik siuarsaanermut tapiissuteqartarfik.
Tapiissuteqartarfik Sermeq pillugu paasisaqarnerorusukkuit uani atuarnerusinnaavutit.