Sermersooq Business Paamiup kujataani umimmaliinissaq pillugu innuttaasunik ataatsimiisitsipput. Sermersooq Business Per Nukaaraq Hansen ukiorpassuarni piniarnermi nakkutilliisutut suliaqarsimasoq suleqatigalugu saqqummiipput. Per Nukaaraq umimmannik nuussisarnerit aammalu Kalaallit Nunaanni umimmaqarneq pillugu ilisimasaqarluartuuvoq.
Paamiup kujataani umimmaliinissamik suliaqarneq ukiuni arlalinni ingerlasimavoq. Suliniut Paamiormiunut pingaaruteqarluartuuvoq, umimmaliinissamik isuma Paamiormiumit Henrik Rachlevimit siunnersuutigineqarsimalluni. Isumassarsiarlu Inuussutissarsiornermut siunnersuisooqatigiinni ilaasortat ilaannit aamma qaqeqqinneqarnikuulluni.
Innuttaasunik ataatsimiisitsinermi orniguttut suliniummut suliallu sumut killinneranik tupinnanngitsumik paasisaqarusussuseqarput. Sermersooq Business ukioq 2022-mi suliniut pillugu innuttaasunik ataatsimiisitsereernikuuvoq.
“Taamak soqutiginnittoqartiginera nuannerpoq. Orniguttut 33-t assut suliamut tunniussimapput, apeqqutillu pingaarutillit apeqqutigineqarlutik. Tamanna tupinnartuunngilaq, suliniummi innuttaasunut Paamiuneersunut periarfissarpassuarnik pilersitsisussaammat”, taama oqarpoq Sermersooq Businessimi suliamik aqutsisoq Susanne Bisgaard.
Sermersooq Business ulloq manna tikillugu najukkami soqutigisaqaqatigiit, Alisarnermut Piniarnermullu Naalakkersuisoqarfik aamma Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik, Pinngortitaleriffik allallu suliamut tunngatillugu ilisimasallit qanimut suleqatigiuartarsimavaat. Suliamilu pingaarutilittut qitiujuassaaq najukkami innuttaasut suliamik piginneqataanissaat, taamaattumillu aappassaanik innuttaasunik ataatsimiisitsisoqarpoq. Biologit naasoqassuseq pillugu kingullermik misissuimmata paasineqarpoq qeqertaasaq Paamiup kujataata tungaaniittoq umimmaliiffissatut tulluartuusoq.
“Suliniut uunga killereerpoq, kisianni suli pingaaruteqartunik aalajangiisoqartussaavoq, soorlu umimmaat qassit nuunneqassanersoq qaqugulu tamanna pissanersoq. Aamma najukkami soqutigisaqatigiit peqatigalugit umimmaliiffissami Aqutsisoqarfimmi pilersaarusiortoqassaaq. Nuannaarutigaarput suliniummut najukkami najugaqartut suleqatigilluarneri tupersersuilluarnerallu. Sulinut pillugu Paamiuni innuttaasut paasititsiiffigineqartuarnissaat suliamullu peqataatinneqartuarnissaat ingerlateqqissavarput”, Susanne Bisgaard oqarpoq.
Umimmaliinerup inuussutissarsiornermi ineriartortisoqarnissaanik imaqartussaavoq. Piffissaq ungasinneq eqqarsaatigalugu Paamiuni aallaaniartartut umimmanniartalernissaat anguniarneqarpoq aamma tammajuitsussarsiornermik aallaaniartitsineq pilersinneqarnissaa siunnertarineqarluni, taamaasilluni umimmaliineq illoqarfimmi takornarialerinermut nukittorsaaqataasinnaalluni. Umimmaleereernerup kingorna umimmaat eqqissisimatinneqaqqaassapput, tassani ilimagineqarpoq ukiut siulliit qulit eqqissisimatitsisoqarnissaa, piujuartitsinermik aallaaveqartumik piniartoqarsinnaalernissaata tungaanut.
