Innuttaasunut

Tasiilami suleqatigiinneq tamakkiisumillu aaqqiissutit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Siunissami illoqarfimmi suleqatigiinneq annertusarniarlugu ulluinnarnilu ajornartorsiutaasartut innuttaasunullu unamminarsinnaasut assigiinngitsutigut tamakkiisumik aaqqiissuteqarfigineqarnissaat pillugit Tasiilami kommunimi sulisut assigiinngitsut akornanni piginnaasanik ineriartortitsilluni pikkorissartitsisoqarpoq.

Tasiilami kommunimi sulisut illoqarfimmi meeqqanut angajoqqaanullu tamakkiisumik aaqqiissuteqarfigineqarnissaannut ujartuinissamut suleqatitik suliaqartartullu allat suliatigut piareersarnissaannut tunngatillugu ilitsersuisutut ingerlataqarput. Tasiilami assigiinngitsut akornanni aallarniutigalugu isumasioqatigiinnermi kommunimi immikkoortorpassuarnit peqataasoqarpoq, meeqqerivinni aqutsisuniit allaffeqarfimmi sulisunut.

”Illoqarfimmi attaveqarnermik ilikkariartornermillu tunngasunik ilisimasanik siammarterisinnaasunik sulisunik ilisimasalinnik piginnaaneqarluartunik pilersitsinikkut angajoqqaanut meeqqanullu ataatsimut suliniuteqarnissaq siunertaavoq”, Martha Abelsen, Meeqqanut Ilaqutariinnullu Ingerlatsivimmi pisortaq nassuiaavoq.

Qaammatini arfinilinni tullerni peqataasut suleqatigiikkuutaanik pitsaasumik isumassuinermik ilikkariartornermilu sungiusaassapput, matumani Tasiilami meeqqanut angajoqqaanullu ataatsimoorussamik suliniuteqarnissaq siunertaralugu assigiinngitsunik suliallit sukangasuumik suliaminni killissarititaasut atorunnaarsinneqarnissaat pillugu.

”Ilinniartitaaneq naammassippat suleqatigiit taakku, innuttaasut suleqatigalugit, innutaasut ulluinnarni ajornartorsiutaannik unamminartitaannillu ajornanngitsunik nikerartinneqarsinnaasunillu tamakkiisumik aaqqiissutaasinnaasunik ineriartortitsisinnaassapput, ilinniartitaanermilu qulequttat aalajangersimasut taakku illoqarfimmi peqataasut kissaataat malillugit toqqarneqarsimapput”, Martha Abelsen oqarpoq.

Tasiilami assigiinngitsut akornanni piginnaasanik ineriartortitsinermik ilinniartitsineq Kommuneqarfik Sermersuumi Meeqqanut Atuarteqarnermullu Ingerlatsiviup, Suliffeqarnermut Isumaginninnermullu Ingerlatsiviup aamma Meeqqanut Ilaqutariinnullu Ingerlatsiviup kiisalu Fairstart Fondenip akornanni suleqatigiilluni aallartinneqarpoq.

Fairstart Fondenimi ilisimatuutut misissuinerit tunngavigalugit ulluinnarni pitsaasumik isumassuinermut atuutsitsilernissaq illoqarfimmilu meeqqanik inuusuttunillu sullissinermi piginnaasat ineriartuaartinneqarnissaat tapersersorneqarnissaat siunertaavoq, 2012-imiilli nunarsuaq tamakkerlugu ilitsersuisunik ilinniartitsisoqartarpoq.