DMI-p Tasiilami piterartoqarnissaa aarlerusaarutigaa. Marlunngornerup ualikkuani anorersuaq apuunnissaa naatsorsuutigineqarpoq, pingasunngornermilu unnukkut qaangiuukkiartulernissaa ilimasaarutigineqarluni.
Taamaattumik atuarfik paaqqinnittarfiillu pingasunngornermi februaarip arfineq-pingajuani matoqqanissaat aalajangiunneqarpoq.
Naak persertarnissaa ilimanaateqaraluartoq, piteraq sakkortorujussuarnissaa ilimagineqanngilaq, piterarneratali nalaani kommunimit imaluunniit upalungaarsimasunit ikiorneqarnissamik pisariaqartitsigaanni upalungaarsimasunut sianertoqarsinnaavoq, oqarasuaat +299 36 77 89-imut.