Borgmester Avaaraq Olsen Tasiilami Najukkamik ataatsimiititaliap ukioq 2022-mut ukiumut nalunaarusiartik saqqummiummassuk Nuummi Kommuneqarfiup Allaffianit skærmersuakkut peqataavoq. 2023-mi pilersaarutit borgmesterimut aamma saqqummiunneqarput.
Ukiumi qaangiuttumi suliniutit amerlasuut pissanganartut akornanni, najukkami ataatsimiititaliaq ilaatigut aaqqissuussat SUSNOW aamma Siu-Tsiumik suleqateqarnerit pillugit oqaluttuarpoq. SUSNOW najukkami ataatsimiititaliaq suleqatigalugu inuussutissarsiorneq pillugu isumasioqatigiisitsinermik aaqqissuussivoq, aningaasaliisoqarlunilu taamaalilluni SUSNOW atoqatigiinnermi pissutsinik ilinniagalik peqatigalugu Tasiilami inuusuttunut kinguaassiuutit pillugit ilinniartitsinermik aaqqissuussisinnaaniassammat.
Siu-Tsiu suleqatigalugu najukkami ataatsimiititaliaq aamma Inuusuttut Kulturikkut Illuannit Igdlomit ikiorneqarlutik eqqakkanik katersineq piviusunngortippaat. Siu-Tsiu aamma Tasiilaartimi illuaqqamut pequsiorpoq najukkamilu ataatsimiititaliaq generatorimik aamma kajumissutsimik sulisunut grilligassanik suliniummut tapersiivoq.
Najukkami Ataatsimiititaliaq aamma ukiumoortumik illoqarfimmi utoqqarnut nereqatigiitsitsinermik aaqqissuussisarpoq. 2022-mi apriilimi utoqqaat 52-it katersortarfimmi nereqatigiinnermi peqataapput, utoqqaat nereqatigiipput nuannisarlutillu.
Taakkua saniatigut najukkami ataatsimiititaliaq nammineerluni sammisassanik aaqqissuussisarpoq amerlasuunillu tapersiissuteqartarluni. Ilaatigut Kulusuk Band aamma Sanalukkanik eqqumiitsuliortut Nuummukarnissaannut tapersiisimallutik, innuttaasoq ataaseq iliveqarfimmi sanningasut nutarternissaannut atugassanik qalipaatinik qalipaasiutinillu tapiiffigitippoq, arsaattartullu klubbiat ATA qimmit nerisassaannut pisinissamut tapiiffigineqarput, taamaalillutik meeqqat sinerissamiittut futsalimi GM-eriarlutik Tasiilamut tikittut Tasiilami qimusserneq misigissammassuk.
2023-mut pilersaarutit
Najukkami Ataatsimiititaliaq pilersaaruteqarpoq, illoqarfimmi aaqqissuussanut assigiinngitsunut 350.000 koruuninut tapiissuteqassalluni. Illoqarfimmi pingasunik annertuumik torersaasoqassaaq, aasallu ingerlanerani eqqakkanik katersisoqareerpat illoqarfimmi innuttaasunut tamanut grillereqatigiittoqassalluni. Novembarimi “assuarluni nereqatigiinneq” aaqqissuunneqassaaq illoqarfimmi peqatigiiffiit aaqqissuussisoralugit, unnuk ataaseq assigiinngitsorpassuarnik aliikkutassaqartitsiffiusoq.
Kangerlummi kuuit eqqaanni ikaartarfiliornissaq pillugu aamma pilersaaruteqartoqarpoq. Pisuttuartartummi kuuit eqqaanni ikaartarfinnik amigaateqarput, ikaartarfiit Tasiilap pinngortitarsuani immikkuullarissumi pisuttuarnermi periarfissanut annertuumik ikorfartuissapput. Pinngortitami kisimi sanaartortoqassanngilaq, najukkamimi ataatsimiititaliaq aamma illoqarfiup kusassarnissaanut 100.000 koruuninik aningaasaliissalluni piareeqqavoq. Pinnguartarfiit arlallit nutarterneqassapput sanaartorneqassallutillu aamma illoqarfimmi sumiiffinni assigiinngitsuni issiaartarfilersuinikkut aamma pavilloniliornilersuinikkut “uninngaarfiusinnaasut” sanaartorneqassapput.
Najukkami Ataatsimiititaliamik ataatsimeeqateqarneq borgmesterimit tupaallaatigineqarpoq.
”Nuannerpoq tusarlugu, najukkami ataatsimiititaliaq taama eqeersimaartigisoq aamma innuttaasut pisariaqartitaannut eqqummaarilluni, pissanganartunillu ulapputeqarluni. Ukiup kingulliup ingerlanerani amerlasuunik sammisassaqarsimavoq, ukiormannalu pilersaarutit aamma pissanganarpasipput, Tasiilamilu innuttaasunut iluaqutaalluassallutik. Kommunimi najukkami ataatsimiititaliat tamarmik illoqarfinnut annertoorujussuarmik sunniuteqarput, aaqqissuussinerilu innuttaasunut toqqaannartumik attuisuullutik. Taamaalillutik kommunit innuttaasullu akunnerminni susassareqatigiinnerinut annertuumik isumaqarlutik”, borgmester Avaaraq Olsen oqarpoq.
SUSNOW aamma Siu-Tsiu pillugit sukumiinerusumik ukua linkit aqqutigalugit atuarsinnaavutit.