Sermersooq Business takornariartitsisutut sulineq pillugu Paamiuni sukisaarsartarfimmi Kalaalermi aamma Majoriami inuusuttunut saqqummiimmata soqutiginnittoqarluarpoq.
Sermersooq Business januaarip 28-ani sukisaarsartarfimmi Kalaalermi saqqummiipput, tassani takornariartitsisartutut ilinniagaq takornariartitsisutullu ulluinnarni suliarisartakkat saqqummiunneqarput.
”Soqutiginnittoqarluarpoq. Inuusuttut 25-t takkupput tusarnaariarlutik. Tamanna nuannaarutigaarput”, taama oqarpoq Sermersooq Businessimi sulisoq Trine Mogensen.
Inuussutissarsiornermut pisortaq Mads-Daniel Skifte suleqataalu Trine Mogensen saqqummiinerminni ilaatigut sammivaat takornarissanik sullissineq, suleqatigiit akornanni suleqatigiinneq kiisalu takornariartitsisup pisinnaasariaqagai. Takornariartitsisutut sulinissaq periarfissaalluarpoq, aasap ingerlanerani naatsorsuutigineqarpoq takornariartaatitigut takornarissat 20 tusindit missaaniittut tikinnissaat.
“Pingaaruteqarpoq najukkami najugaqartut takornarialerinermi sulinermi “piginneqataanissaat”. Tusindilippassuit tikittussaapput, taakkulu piumasaraat misigisaqarluarnissartik tamannalu najukkami najugaqartut tunniussinnaavaat. Paamiuni najugallit taakkuupput illoqarfimmi oqaluttuassartaanik aammalu kulturi pillugu ilisimasaqarnerpaat”, inuussutissarsiornermut pisortaq Mads-Daniel Skifte oqarpoq.
Sukisaarsartarfimmi Kalaalermi saqqummiisoqarmat inuusuttut 25-t peqataapput, Paamiuni Majoriami ilinniartunuinnaq saqqummiisoqarluni. Saqqummiisoqarnerani inuusuttut arlallit soqutiginninnertik takutippaat aammalu takornariartitsisutut sulinissamut attaveqarfigineqarsinnaasutut allatsillutik. Taakkunani ilaavoq Jonna Jakobsen Jensen, 29-nik ukiulik.
”Allatsippunga guidetut sulinissaq nuannerunartikkakku. Paamiut illoqarfigaara, inuunerma tamaat peroriartorfigisara, taamaammat aamma Paamiut takornarissanut nuannersumik kusanartumillu takutinnissaa pingaartippara. Inuit nutaat naapinnissaat pissanganartuaannarmat tuluttullu oqaatsikka atornissaa nuannarisarakku aammalu tammariartunnginnissaannut atorniassagakkit. Saqqummiisoqareermat guidetut sulisinnaanera pilerigilerpara”, Jonna Jakobsen Jensen oqarpoq.
Sermersooq Businessimi sulisut januaarip naajartornerani Paamiuniipput, tassani ilaatigut innuttaasunik ataatsimiisitsipput, Imarsiornermut Ilinniarfik aamma Royal Greenland pulaarpaat aammalu Najukkami ataatsimiititaliaq Inuussutissarsiornermullu siunnersuisooqatigiit ataatsimeeqatigalugit.