Borgmesterip Avaaraq Olsenip kaammattuineratigut Iserit-imi kommunimilu inissianut akinik aalajangersaasarneq pillugu arlaannaannulluunniit attuumassuteqanngitsunik misissuisitsisoqarsinnaanera kommunalbestyrelsimit oqaluuserineqarpoq. Maannakkullu misissuinissaq aallartinneqalerpoq.
Borgmesterip kaammattuinera pivoq pisuni marlunni inissianut akinik aalajangersaasarneq pillugu kukkusoqarsimanera qanittukkut paasineqartoq tunngavigalugu. ”Kommunitsinni innuttaasut ineqarnermut akiliutiminnit annerusumik akiliissanngillat. Suliat pioreersut tunngavigalugit, isumaqarpunga pissusissamisoortoq, ineqarnermut akiliutit tamarmik eqqortuunersut misissussallugit”, Avaaraq Olsen oqarpoq.
Kaammattuummini Avaaraq Olsen kommunalbestyrelsimut allappoq: ”Inissiaqarfiit blokkit marluk pillugit suliap kingunerisaanik, inissiap akia kukkusumik naatsorsorneqarsimanera pillugu, kommunalbestyrelsimut siunnersuuteqarpunga Iserit-imi kommunimilu inissianut akinik aalajangersaasarneq pillugu arlaannaannulluunniit attuumassuteqanngitsut misissuisinneqarnissaat pillugu.”
Avaaraq Olsen borgmesterinngoramili annertuumik torersaaneq aallartippaa, kukkunernik ataavartumik nassaarfiusut qitiutillugit, tassunga ineqarnermut tunngasut ilanngullugit: ”Suliat annertuut arlalinnut tunngasut ukiuni kingullerni innuttaasut kommunimut tatiginnikkunnaarsippaat. Uannut pingaaruteqartuuvoq tatiginninnerup pilerseqqinneqarnissaa. Tatiginnilersitseqqinnissaq sulissutigerusuppara, taamaattumillu suliniut imatut ittoq pisariaqartipparput.”
Kommunalbestyrelsip tamarmiusup ulloq 13. februaari arlaannaannulluunniit attuumassuteqanngitsumik misissuineq pillugu siunnersuut oqaluuseraa akueralugulu.