Borgmesteri Avaaraq Olsenip kommunalbestyrelsimut siunnersuutaa, pitsaassutsimik immikkoortortamik pilersitsinissaq kommunalbestyrelsimi tamanit isumaqatigineqarluni akuersissutigineqarpoq. Immikkoortortap qulakkiissavaa maleruagassat unioqqutinneqannginnissaat. Maanna atorfilittat marlunnik siunnersuusiussapput Pitsaassutsimut immikkoortortaq qanoq pilersinneqassanersoq.
”Nuannaarpunga siunnersuutiga kommunalbestyrelsimi tamanit akuersissutigineqarmat. Pitsaassutsimut immikkoortortamik pilersitsinerup qulakkiissavaa maleruagassat unioqqutinneqannginnissaat, ilutigalugu suliassiissutinik suliaqarnerup pitsaanerulerneranik aammalu tamanut sullissinerup pitsaanerulernissaanik kinguneqassaaq” borgmesteri Avaaraq Olsen oqarpoq.
Kommunalbestyrelsimi partiit suleqatigiit, Naleraq aamma IA, immikkoortortap nutaap pilersinneqarnissaanik, ukioq manna aningaasaqarnermut ataatsimiititaliap ataatsimiinnerani siullermi saqqummiunneqartumik siunnersuuteqarsimapput. Siunnersuullu maanna Kommunalbestyrelsimit suliarineqareerluni akuersissutigineqarpoq.
Sulisut 2.300-ngajaammata, ingerlatsiviit tallimaammata aammalu kiffartuussinerit inatsisitigut aalajangiiffigisat amerlammata, immikkoortortamik, aaqqissuussaanermi tamarmiusumi maleruagassanik tamanik malinninnissamut ikiuuttussamik, tamatumalu peqatigisaanik kommunimi torersaassineq pillugu politikerinut ilisimatitsisartussamik peqarnissaq annertuumik pisariaqartinneqartoq borgmesteri isumaqarpoq.
”Erseqqissarusuppara, kukkunersiuinerinnarmik suliaqarnissamik pilersitsinissara kissaatiginnginnakku. Ingerlatsivitta kiffartuussinittalu pitsaanerulersinnissaat kissaatigaara. Pitsaassutsimut immikkoortortaq ingerlatsivinnut ataasiakkaanut suliatigut ikiuisassaaq, aammalu suliffeqarfiup iluani pitsaassutsimik aqutsissutinik, kiffartuussinitsinni pitsaassutsinik aalajangerneqartunik inatsisinillu malinninnissamik qulakkeeriffiusunik pilersitsinissaq isumagissallugu. Ukiuni kingullerni kukkunerpassuit uuminartut pilertarsimapput aammalu kommunip innuttaasunik sullissiniarnerani periarfissanik ajornerulersitsisarsimallutik”, Avaaraq Olsen oqarpoq.
Atorfilittat pitsaassutsimut immikkoortortaq qanoq isikkoqarsinnaaneranik marlunnik siunnersuutinik suliaqareerpata Kommunalbestyrelsi aalajangerumaarpoq pitsaassutsimut immikkoortortaq qanoq isikkoqarluni pilersinneqassanersoq.