Paamiuni Katersugaasivik Puilasunnguamit qaaqquneqarnini qujarullugu akueraa. Paamiuni Katersugaasivik assinik qanganitsanik seqersitsilluni utoqqarnut saqqummiivoq. Aaqqissuussamit assit uani takukkit.
Puilasunnguani sammisassaqartitsivik Puilasunnguani najugalinnut assigiinngitsunik sammisassaqartitsisarpoq, sapaatip akunneranilu uani Paamiuni Katersugaasivik suleqatigalugu assinik qanganitsanik seqersitsaarisoqarpoq.
”Assitoqat amerlasuut skannernikuuagut, taamaasilluni assiliarpassuit nassaruminarsillutik taamaasillunilu utoqqarnut Puilasunnguami najugallinut takutinnissaat ajornannginnerulerluni. Katersugaasivimmiit ”anilaarluni” aammalu katersugaasivitta ”allamukaatilaarnera” iluarpoq, minnerunngitsumillu utoqqaat kiinaat nuannaartut takusinnaallugit nuanneqaaq”, Paamiuni Katersugaasivimmi sulisoq Augustine Rosing oqarpoq.
Puilasunnguani sammisassaqartitsisut sammisassaqartitsisarnerat assigiinngitsuusarput, sapaatip akunneranilu uani aaqqissuussaq timikkut atuineruallaanngikkaluartoq misigisimasanik eqqaamasanik utersaartitsivoq.
”Najugaqartuutigut assit takusatit nuannareqaat. Ilisarseriarlutik nuannaarlutik nillertarput, aliannaarlutik ilisarisatik aqqi taajortarpaat aamma qanga Paamiuni illut isatersimasut ilisaralugit sumut atorsimaneri oqaluttuarisarpaat. Eqqaamasanik utersaarrapput taamaattumillu najugaqartunit nuannarineqaqaluni”, taama oqarpoq Puilasunnguani sulisoq, Rosannguaq Johansen.
