Nuup Saava ukiuni tulliuttuni ineriartortinneqartussaavoq, kisiannili ineriartortitsinermi suut siunnerfigineqassappat? Apeqqut taanna Kommuneqarfik Sermersuup innuttaasunut saqqummiuppaa, kikkullu tamarmik siunnersuuteqarnissamut aammalu aaqqiissutissat ilaannut tapiliussinissamut tikilluaqquneqarput.
”Nuup Saava oqaluttuarisaanitsinnut annertuumik attuumassuteqartoq Nuummut takornariartartut suli amerliartortut ornigannaaraat, aammalu najugaqartorpassuarnit ulluinnarni atorneqarluni. Sumiiffik tamanna akuttunngitsumik uummaarissisarpoq, aammalu ukiup ingerlanerani pisorpassuarnut sinaakkusiisarluni. Tassalu ‘Nuup Saava Nuannarisarput’ sumiiffiuvoq innuttaasut tamarmik ornissallugu nuannarisinnaasassaat”, Pilersaarusiornermut Oqartussaaffimmullu pisortaq, Runa Sværd oqaluttuarpoq.
Nuup Saavata qanoq iliorluni ineriartortinneqarsinnaanera pitsanngortinneqarsinnaaneralu, taamaalillunilu innuttaasunit amerlanerusunit atussallugu ornissallugulu nuannaarutaasinnaanera, tamatumunngalu peqatigitillugu sumiiffiup suussusiata oqaluttuarisaaneratalu pitsaanerpaamik paarineqarsinnaanera Kommuneqarfik Sermersuumiit paaserusunneqarpoq. Siornatigut sumiiffiup biilerfiujunnaarluinnarnissaa pillugu apeqqutinik saqqummertoqartarsimavoq, aammalu Orsiiviup Nuunnguani sumiiffiup soqanngitsup ineriartortinnissaanut arlalinnik siunnersuuteqartoqartarsimavoq.
https://kommuneqarfiga.sermersooq.gl/kl-GL/projects/vores-nuupsaava-1
Runa Sværd itisiliivoq: ”Paasivarput, Nuup Saava illoqarfimmi innuttaasunut immikkorluinnaq isumaqartoq. Taamaattumittaaq sumiiffiup ineriartortinnissaanut innuttaasut soqutigisaqartullu akuutinnissaat nalilittut isigaarput. Tamatumani kommunimi suliap ersarinnissaa angusussaagatsigu, kisiannili aamma pingaartumik innuttaasut suleqatigalugit innuttaasunut pilersitsisinnaagatta. Innuttaasut isumaannik isumassarsiaannillu tusagaqarnissarput qilanaaraarput, aammalu soorunami amerlasuut peqataarusussasut neriuutigaarput.”
Isumassarsiannik tapiliussigit
Taamaattumik Kommuneqarfik Sermersuumi Sanarfinermut Avatangiisinullu Immikkoortortaqarfiup siunnersuisarfik Inuva suleqatigalugu innuttaasunik akuutitsiniarnermi suliamik ingerlatsivoq. Siunnersuisarfik avataaneersoq innuttaasunik akuutitsinermik sammisaqartitsinermillu misilittagaqarpoq, tassanilu kommunip suliami, februaarimiit apriili ilanngullugu ingerlanneqartussami qalliunnginnissaa qulakkeerneqassaaq. Innuttaasut qanorluunniit ukiullit sammisaqartitsinermut peqataanissamut, online-kkut isumassarsiaminnik saqqummiussinissamut, kiisalu apeqqutinut immersorlugit akisassanut naatsunut akissuteqarnissamut periarfissaqassapput.
Allaffeqarfimmiit kommunalbestyrelsimiillu innuttaasut Nuup Saava pillugu isumaat, aammalu sumiiffik pillugu takorluugaat anguniagaallu paaserusunneqarlutik tamakku tamarmik pisussaapput.
Kommuneqarfiga alakkarlugu suliap ingerlanera pillugu atuagaqarsinnaavutit, sammisaqartitsinissat pilersaarutigineqartut pillugit annertunerusumik paasisaqarsinnaavutit, apeqqutit akisassat naatsut akissuteqarfigalugit kommuni ikiorsinnaavat, kiisalu oqallinnermut peqataasinnaallutit.