Utoqqaat Puilasunnguani najugallit sapaatit akunnera kingullermi Piorsaavimmut pulaarput. Puilasunnguami najugaqartut suliffeqarfinnik pulaartarnissartik kissaatigisimavaat, Piorsaavillu siulliulluni pulaarneqarpoq.
Paamiuni utoqqaat illuat, Puilasunnguit utoqqarnut Sammisassaqartitsivimmik immikkoortortaqarpoq. Puilasunnguami sulisut utoqqaat najugallit aperisimavaat sammisassaqartitsinermi sulererusuttarnersut, akissutaannullu ilaavoq suliffeqarfinnut pulaartarnissaq.
”Puilasunnguami najugalinnut sammisassaqartitsisarpugut, sammisassaqartitsisarnitsinnilu utoqqaat aperisimavagut sulererusuttarnersut. Taakku suliffeqarfinnut pulaarusullutik oqariartuuteqarput”, sammisassaqartitsisoq Najatta Hegelund oqaluttuarpoq.
Piorsaavik sannaviuvoq Majoriap ataani inissisimasoq, inuusuttut sammisassaqartinneqarnissaannik suliaqartoq, Paamiuni pissutsinnut inuusuttullu pisariaqartitaannut tulluarsarneqarsimasoq. Inuusuttunut sammisassaqartitsinerup ingerlanerani sulisinneqartarput, ulluinnarni pisassaqartuarnissaat ilusilersorneqartarluni aammalu sulianik misilittagaqalernissamik pilersitsisinnaanermillu ilinniartinneqartarlutik.
Utoqqaat Piorsaavimmut pulaarnerminni inuusuttunit oqaluttuarfigineqarput ulluinnarni inuusuttut Piorsaavimmi sulerisarnersut, kisianni aamma inuusuttut utoqqartaminnit oqaluttuarfigineqarnissamik kissaateqarsimapput, taamaasilluni utoqqaat qanga misigisimasaminnik inuusuttunut aamma oqaluttuarput.
”Utoqqaat najugallit marluk qanga sulerisarsimanerlutik oqaluttuarput, inuusuttullu soqutiginilluarlutik tusarnaarput. Nuanneqaaq takullugu inuusuttut utoqqaallu paarlaasseqatigiissinnaanerat”, Najatta Hegelund oqaluttuarpoq.
Utoqqarnut inuusuttunullu misigisaq nuannersoq utoqqaat inuusuttunut qaaqqusinerannik kinguneqarpoq, ataasinngormallu ullaakkut ilinniartut Puilasunnguanut pulaarput utoqqaallu erinarsoqatigalugit.
”Nuanneqaaq takullugu inuusuttut utoqqaallu qiimmassaqatigiittut, oqaluttuaqattaartut illaqattaartullu. Utoqqaat suliffeqarfimmut allamut pulaarnissartik qilanaarilereerpaat”, Najatta Hegelund unnersiorpoq.
Puilasunnguani erinarsoqatigiinnermit assit ataani takuneqarsinnaapput.
