Services

Ukioq manna timersortartut ulluat 2023

Ileqquusumik Kommuneqarfik Sermersooq Timersortartut ulluat ingerlappaa.

Timersortartut peqatigiiffiillu angusaqarluarsimasut kommunip illoqarfiini tamani aaqqissuussinerni nersorniarneqarput. Aaqqissuussaq angisooq Nuummi Katuami ingerlanneqarpoq, ataatsimiititaliami siulittaasoq Juaaka Lyberth aamma borgmesteri Avaaraq oqalugiartoralugit. Ilaatigut oqalugiaatimini ilanngullugu oqaatigaa timersornerup inuit ataqatigiisittarai, ikinngutigiinneq ataatsimoornerlu, taamaammallu timersortartut inuiaqatigiinni inuusunnerusunut maligassiuisuunerat oqaatigalugu. Naggataatigullu timersortartut tapersersuisullu tamaasa qutsavigai.

”Tamassinnut qujarusuppunga. Ullumikkut nalliuttorsiutigineqartusi qutsavigaassi, taamaattussaavormi. Aammali tapersersuisartorpassuarnut piviusunngortitsisartunut. Ullorsiorluarnissassinnik kissaappassi.”

Innuttaasut 400-t sinnerlugit Nuummi aaqqissuussami najuupput, nipilersornermik ilinniarfimmeersut nersornaasiinerit akornini aliikkusersuipput.

Ukioq manna aammaarluni timersortartut nersorneqartut timersuutinik assigiinngitsunik atuisuupput, taakku saniatigut nersorneqartut arlallit aamma nersorniarneqarput ukiup ingerlanerani suliaannut pitsaalluinnartunut qujaniarfigineqarlutik.

Nuummi toqqagaasut:

Timersullammak: Patrick Frederiksen – B-67 fodbold

Iligiillammaat: B-67 fodbold herrer

Sungiusaasuullammak: Ole Martinsen – NÛK

Aqutsisuullammak: Augustine Fleischer – GSS Håndbold

Piukkunnaatilik: Julian Arleth – B-67 badminton

Kajumissaat: Nuuk Gymnastikforening

Tasiilami toqqagaasut:

Timersullammak: Jakobine Uitsatikitseq

Piukkunnaatilik: Aviana Kilime Maratse

Kajumissaat: Celina Soriina Lyberth

Paamiuni toqqagaasut:

Timersullammak: Malik Thorsen Petersen

Sungiusaasuullammaat: Ilannguaq A. Jensen & Mario Hermansen

Aqutsisuullammak: Kim J. Jensen

Piukkunnaatillit: Pani Josefsen & Ariel Rachlev

Kajumissaat: Elisabeth Jaja Joelsen – Mininnguaq Rasmussen – Utertoq Berthelsen

Ittoqqortoormiini toqqagaasut:

Timersullammak: Dines Pike

Piukkunnaatilik: Erneeraq Danielsen

Kajumissaat: Esaias Danielsen

Ajugaasut tamaasa pilluaqqungaarpagut!

Aaqqissuussinerup naajartornerani Kommuneqarfik Sermersuumi timersornikkut angusat kusanarluinnartut takutinneqarput. Video uani takuuk: