Services

Borgmesterip ukiortaami oqalugiaataa – 2022

Avaaraq Olsen siullermeerluni borgmesteritut oqalugiarpoq, oqalugiaammini atuarfiit, meeqqanik paaqqinnittarfiit aammalu pisortat assartuussineri pitsaanerusut kiisalu nammineq kajumissuseq atorlugu sulineq aammalu kalaallit piorsarsimassutsikkut nukittoqqutaat eqqartorpai. Borgmesterip kikkunut tamanut pilluaqqusiutigaluni oqariartuuteqarpoq: Allanut inussiarnersuuneq ikiuunnerlu akeqanngillat, tamattalu taamaaliornitsigut pisuujunerulertussaavugut.

Kommuneqarfik Sermersuumut siunnissaq pissangartuuvoq; Kommuneqarfik Sermersooq nunarsuarmi najugaqarfigissallugu pitsaanerpaanut ilaassaaq. Atuarfigut, ulluunerani paaqqinnittarfiit, attaveqaatigut aammalu sunngiffimmi sammisassaqartitsisarnigut nunarsuarmi pitsaanerpaanut unammillersinnaasariaqarput. Aammami nunarsuarmi pitsaanerpaanut unammillertooreerput.

“Kalaallit inuusuttut Danmarkimi ilinniakkaminnik naammassinnikkaangamik aatsaat inuiaqatigiit neqeroorutigisinnaasaat iluarigaangamikkit Kalaallit Nunaannut uterniarlutik aalajangertarput. Aammami nunarsuup sinneraniit sulisussanik qaffasissunik ilinniagalinnik tikisitsiniaraangatta taamaappoq”, Avaaraq Olsen oqalugiaammini oqarpoq, nangillunilu;

“Perorsaasugut, ilinniartitsisugut, isumaginninnermi siunnersortigut kommunimilu atorfillit allat tamarmik ullumikkut innuttaasunut kiffartuussilluarniarlutik ulapereerput: Politikeritut suliassaminnik naammassinninnissamut pitsaasunik sinaakkusersorneqarnissaat, taamaalillutillu innuttaasut suli pitsaanerusumik kiffartuunneqarnissaat suliassatut ataqqinarnerpaatut isigaara.”

Inuiaqatigiit angerlalluassappata, nammineq kajumissuseq atorlugu sulineq pisariaqartinneqarpoq, aamma Kommuneqarfik Sermersuumi innuttaasunik taamatut suleqataasunik ulikkaarpoq. Innuttaasut nammineq kajumissusertik atorlugu sulinertik pisussaaffitut isigalugu suleqataasut. Taakku tassaasinnaapput timersornermi aqutsigut, sapaatit akunneranni akunnerit arlallit atorlugit timersornermi misilittakkaminnik nuannarisaqarnerminnillu inuusuttunut ingerlatitseqqittartut. Angajoqqaajusinnaapput unnuit ilaannik meeqqamik atuarfiini paaqqinnittarfinnilu paarineqartarfiini siulersuisuni ilaasortatut atuisartut. Aamma inoqarpoq juulliaqqap unnukkuutaani atugarliortut juullisiornissaannik isumagisaqartut. Sulisitsisuusinnaapput, sulisunik suliaminnik paarsinissamut ikiorserneqartariaqalaartunik sulilersitsisut.

“Tamassinnut qujanaq. Ilimagisassinnit annertunerusumik allannguisarpusi. Kommunitsinni nammineq kajumissutsimik sulineq ingerlalluaraluartoq, inuppassuillu akissarsiaqaratik sulisaraluartut suli nammineq kajumissutsimik sulisinnaasut suli amerlanerusut inissaqartinneqarput. Meeraasinnaapput inuusuttuusinnaallutillu, inersimasumik maligassaminnik pisariaqartitsisut, aamma utoqqaasinnaapput pulaartartussaminnik pisariaqartitsisut”, borgmesteri Avaaraq Olsen taama oqarpoq.

Kulturerput nukittuujusoq, ataatsimoornermik, ikiuukkumatussuseqarnermik inussiarnersuunermillu qitiutitsiffiusoq aamma oqalugiaammi eqqaaneqarpoq.

“Issittumi ilisimasassarsiortut, misigisassarsiortut, palasit arfanniallu siulitsinnik assigiimmik allaaserinnittarnerat malunnartorujussuuvoq. Kalaallit nunarsuarmi aggerfimminni annaaneqarsimasunik peqartut isumaqatigiillutik oqaatigisarpaat. Nunnikkaangamik tikilluaqqusisarnerat nuannaarnerallu sukumiisumik allaaserisarpaat”, Avaaraq Olsen oqarpoq, naggasiillunilu;

“Siunissamut pitsaasumut matuersaat siulitsinniit nassaarisinnaagipput qularinngilara. Tamatta pisinnaasatsinnik iliuuseqarutta akunnitsinnilu paareqatigiikkutta ukiortaat tamaasa ukiut pitsaanerusut qilanaarluta takusinnaalissavagut. Ukioq meeqqat sumiginnakkat ikinneruffiat aamma inuit amerlanerusut ataatsimoorfinnut ilaalerfiat. Pitsaanerlu tassaavoq: Sumilluunniit akeqanngilaq. Allanut inussiarnersuuneq ikiuunnerlu akeqanngillat, tamattalu taamaaliornitsigut pisuujunerulertussaavugut.”

Borgmesterip ukiortaami oqalugiaataa takujuk. Aamma oqalugiaat uani atuarneqarsinnaavoq.