Ukiut tamaasa Kommuneqarfik Sermersooq Angalanissamut Aningaasateqarfimmiit agguaassisarpoq. Aningaasaateqarfiup siunertaa tassaavoq sumiiffimmi ataasiinnavissuarmi inisseqqasarnerup kingunerinik nuanniissinnaasunik pinaveersaartitsineq. Aammali kommunimi innuttaasut nunarsuarmioqataanermik misigisimanissaannik siunertaqartumik Kalaallit Nunaani avataanilu innuttaasut angalarusunnermik kissaateqarnerannik piviusunngortitseqataarusussuseq.
Kommuneqarfik Sermersuumi innuttaasut tamavimmik qinnuteqarnissamut periarfissaqarput. Qinnuteqartut tamavimmik sukumiisumik Angalanissamut Aningaasaateqarfimmi Siulersuisuniit suliarineqartarput. Qinnuteqartuni ilaqutariit meerartallit isertitakinnerusullu pingaanersiuinermi pingaartinneqarput. Ilaqutariit meerartallit akissaatikinnerusullu ukiuni kingullerni tallimani angalaarsimanngitsut salliutinneqarputtaaq.
Qinnuteqartut tamarmik toqqaannartumik nalunaarfigineqassapput.
Qinnuteqaatit kingusinnerpaamik tallimanngornermi martsip 17-ani 2023-mi nassiutissavat. Paasissutissat allat sullissisumut Birthe Lennertimut, oqarasuaat 367028-mut sianernikkut pissarsiarineqarsinnaapput.