Ullumikkut, ataasinngorneq decembarip ulluisa 12-ianni, Kommuneqarfik Sermersuumi Aningaasaqarnermut Inuussutissarsiornermullu Ataatsimiititaq immikkut ittumik ataatsimiippoq, tassanilu immikkoortoq ataaseq oqaluuserisassaniippoq. Tassa Aningaasaqarnermut Naalakkersuisoqarfimmit kommunimut isornartorsiuisimaneq pillugu.
Kommuneqarfik Sermersooq sapaatip-akunnera kingulleq sakkortuumik isornartorsiummik tunineqarpoq, matumani missingersuusiortarnermut naatsorsuusiortarnermullu inatsimmut akerliusumik, ilaatigut entreprenørmaskiinanik, printerinik ininillu, isumaqatigiissutinik Namminersorlutik Oqartussanit siumoortumik akuersissummik peqqaarnani, attartornermik isumaqatigiissusiorsimanera pillugu.
“Suliaq assut ilungersunartutut isigaarput. Kommuneqarfik Sermersuumi tamatigut inatsisit malillugit sulinissaq kissaatigineqartoq qularutigineqassanngilaq. Kommunalbestyrelsimi ilaasortanut kinguneqartitsisoqassanersoq uagut aalajangiiffigissanngilarput, tassungalu tunngatillugu Aningaasaqarnermut Naalakkersuisoqarfimmit annertunerusumik paasissutissanik tunineqarnissarput utaqqivarput”, Kommuneqarfik Sermersuumi borgmesteri Avaaraq Olsen oqarpoq.
Tamatuma saniatigut allaffeqarfiup pilersaarutaa ataatsimiititamut, siunissami attartornermut isumaqatigiissutit tamarmik misissorneqarnissaannik qulakkeerisussaq, saqqummiunneqarpoq.
Siunissami suliat taamatut ittut pinaveersaartinniarlugit attartornermut isumaqatigiissutit tamarmik, minitaqarani, kommunip Aaqqissuussamik pilersaarusiornermut Misissueqqissaarinermullu Immikkoortortaanut nassiunneqartalissapput, tassani qinnuteqaatit nalilersuffigineqarlutillu Aningaasaqarnermut Naalakkersuisoqarfimmut akuerisassanngorlugit ingerlateqqinneqartalissasut, Pisortaqatigiinnit aalajangerneqarpoq.
”Tamanna allaffissornikkut suliaq annertoorujussuussaaq, inatsisilli malinnissaannut piumasaqaataappat taamaaliortariaqassaagut”, Avaaraq Olsen oqarpoq.