2019-imi ukiakkut Nuummi atortussaasivik gummiged-imik nutaamik pissarsivoq, taannalu taamanili Nuummi aqqusernit aputaajarlugit sulisimavoq. Maskiina nutaajugami 1,2 millioner koruuninik akeqarpoq, tassungali taarsiullugu ingerlatsivik aalajangerpoq, sivikinnerpaamik ukiuni marlunni qaammammut 20.338 koruuninik akiliisarluni attartorniarlugu. Kommunip gummiged qaquguluunniit attartornermut aningaasartuutit ilanngaatigalugit pisiarisinnaavaa.
Isumaqatigiissut taanna, tamatumalu peqatigisaanik entreprenørmaskiinanik qulingiluanik allanik attartornermut isumaqatigiissutit, printerinik attartornermut isumaqatigiissutit qulit aamma ininik allaffeqarfinnik sisamanik attartornermut isumaqatigiissutit atuunneri pissutigalugit Aningaasaqarnermut Naalakkersuisoqarfimmiit Kommuneqarfik Sermersooq uparuarneqarpoq, suliarlu Nakkutilliisoqarfimmut tunniunneqarluni. Uparuaanermut 2018-imi Missingersuusiortarnermut Inatsisip nutaap akuerineqarnera peqqutaavoq, tassanilu piumasarineqarpoq, kommunit attartornermut isumaqatigiissusiunnginnerminni attartornermut isumaqatigiissutit tamaasa Naalakkersuisunut akueritissagaat.
”Missingersuusiortarnermut inatsimmi Aningaasaqarnermut Naalakkersuisoqarfiup nalunaarusiamik, nalinginnaasumik killiliiffiusumik suliaqarsinnaanera periarfissinneqarpoq, tamannalu pilertornerpaamik pissasoq kaammattuutigaara. Aamma Naalakkersuisoqarfimmiit oqaatigineqarpoq, nalinginnaasumik killiliineq paasineqarsimasoq. Tassami ullumikkut inatsit ima sukannertigimmat, inimik ataatsimiiffissamik biilimilluunniit ullormi ataasiinnarmi unioqqutitsinata attartorsinnaanngilagut. Maleruagassat unioqqutissimagatsigit ilumoorpoq, kisiannili inatsisit taama isikkoqartillugit Naalakkersuisoqarfik taasa sakkortutigisumik qisuariarmat eqqumiigaara”, Ole Jakobsen oqarpoq.
Attartornermut isumaqatigiissutit Aningaasaqarnermut Naalakkersuisoqarfimmit uparuarneqartut tamarmik nalinginnaasumik ingerlatsinermut aningaasat atorlugit isumaqatigiissutaapput.
”Isumaqatigiissutigineqarsimasut ingerlatsivinni ataasiakkaani, aammalu kommunip aningaasaqarnera eqqarsaatigalugu isumatusaartumik isumaqatigiissutaapput, kisiannili pisortani oqartussaasutut soorunami inatsisit atuuttut malittussaavagut. Tamanna pissutigalugu siunissami tamatigut akuerisassanngorlugit nassiuttassavagut”, Kommunaldirektøri Ole Jakobsen oqarpoq.
Aningaasaqarnermut Naalakkersuisoqarfiup uparuaanera 15. decembarimi Aningaasaqarnermut Inuussutissarsiornermullu Ataatsimiititaliap ataatsimiinnerani saqqummiunneqassaaq.