Qaammatini pingasuni tulliuttuni Nuup mittarfianut aqqusineq unnukkut unnuakkullu biilinik ingerlassinerit innersuussutigineqanngilaq, piffissami tassani oqimaatsunik assartuisarnissaq pissutaalluni.
Nutaamik mittarfiliornermut atatillugu suliaq uunga killippoq, qaammatini pingasuni tulliuttuni Air Greenlandip saava tungaatigut aqqusinikkut aallariartortarfiup/tikikkiartortarfiup avannaata tungaanut ujarassuarnik assartuinissaq piffissanngorsimalluni.
Isumannaallisaaneq pissutigalugu timmisartup kingulliup unnukkut aallareernerata tikereernerataluunniit kingorna aqqusineq taanna susassaqanngitsunut biilinik ingerlavigineqannginnissaa kaammattuutigineqarpoq. Naatsorsuutigineqarpoq mittarfimmut aqqut nal. 19.00 matuneqartassasoq ullaakkullu ammaqqittarluni. Sapaatikkut sulineq aamma ingerlanneqartarumaarmat kaammattuut sapaatikkut aamma atuuppoq.
Aqqusineq ingerlavigineqartarsinnaajumaarpoq, matuneqarnaviarnanilu, taamaattorli pisariaqanngitsumik/susassaqanngitsunillu ingerlaqqusinnginnermik allagartaliisoqarumaarpoq, taanna Air Greenlandip biilinut inissiisarfiutaata ungasinngisaani nalunaaqutserneqarumaarpoq, soorlumi assimi tamanna takuneqarsinnaasoq.
Taamatut iliortoqarpoq sanaartortut biilii biilillu allat aportoorsinnaanerat pinaveersaarniarlugu, taamaattorli assiaqusersuut upalungaarsimasunit, mittarfimmi sulisunit allanilluunniit suliaminnut atatillugu aqqusaarniartunit aqqutigineqarsinnaavoq.