Atuarfeqarneq Sanaartorneq Services

Nuummi atuarfiup sanaartukkap takutinnissaanut angalaartitsineq

Nuummi atuarfissap sanaartornera ima ingerlalluartigaaq allaat atuarfimmi, meeqqerivimmi aamma sunngiffimmi ornittakkami sulisut atuarfissaq ammarpat sungiusimanerussammassuk ataavartumik alakkarternissaanut kaajallaatinneqarsinnaalerlutik.

2024-mi aasaanerani atuanngiffeqarnerup kingorna Atuarfik Ukaliusami (USK) aamma Atuarfik Samuel Kleinschmidtimi (ASK) atuartut sulisullu atuarfittaami aallartissapput. Aamma Illumi Narsarmiutamilu sulisut meeqqallu atuareernerup kingorna ornittakkamiittartut aallartissapput.

Ilaatigut suliffinni assigiinngitsuni sulisut suleqatigiilersussat imminnut ilisarisimalluarniassammata suliffimmilu ileqqussanik ataatsimoorfeqalerniassammata 2021-p naaneraniilli kattunnissamut atatillugu ataavartumik periarfissiisoqartarpoq.

USK-imi aamma ASK-imi atuartut 950-it atuarfittaami suli atserneqanngitsumi aallartippata, illorsuarmiilissapput atuartunut 1200-nut inissaqartumut 17.500 kvadratmeterisut angitigisumi. Illoqarfik inuttusigaluttuinnarmat atuartunut amerlanerusunut inissaqarniassammat.

Atuarfik meeqqerivillu titartaasartunit KHR Architecture-mit titartarneqarpoq Islandimiullu suliffeqarfiutaannit Istak-imit sanaartorneqarluni. Morten Jannerup sanaartornermi pitsaassutsimut isumannaallisaanermullu pisortaavoq sunngiffimmilu ornittakkami sulisut 27-t sanaartorfimmi angalaartinneqarmata angallassisuulluni. 

Angalaartitsinermi atuarfiit immikkoortui arfinillit imminnut atasut aqqusaartorneqarput taakkulu immikkut tamarmik ukioqatigiinngiiaanut attuumasunik naammassingajalersunik meeqqerivittaqarlutik.

”Init tunngaviusutut ininik taagukkagut amerlanerpaapput. Sanaartorneq naammassineqarpat atuartitsiviusussaapput. Ilusilersorneqarneri naapertorlugit atuartunut 26-nut inissaqarput illorsuarmilu init amerlanerpaat assigalugit angisuunik igalaaqartiterput silallu qaamarnga atorluarneqassalluni. Atuarfissami init tamarmik natermit kiassarneqarput. Natermi kiassarneq eqqarsaatigalugu ledningit maannamut ikkussimasavut 10 kilometerit missaanniipput”, Morten Jannerup oqarpoq.

Atuarfik kantiinaqassaartaaq 400-nut issiavilimmik tassaniissaarlu igaffissuaq kiisalu Kommuneqarfiup Allaffiata akiani multihali angisooq taassumalu silataaniissaaq tunnuliup assilinera angissusivia naapertorlugu ikkunneqartussaq.

Atuarfimmittaaq oqalugiarfissuaq tusarnaartitsinermut, isiginnaartitsinermut isiginnaagassianillu takutitsinermut kiisalu nipilersortarfik atuarfinnit atorluarneqartassapput, aamma ulikattaarfik qitittarfillu silami sammisassaqarnermut sumiiffimmut isikkivilimmik peqassalluni. Sumiiffiit sammisassaqartitsinermut atortut pinnguartarfeqarlutillu ammaannartunik pinnguarfiusinnaasunik immikkoortoqassapput aammali atuartitsinermut atorsinnaasumik Nunatsinni pinngortitamit naasunik peqassalluni.

”Maannakkorpiaq sanaartorfimmi inuit 100-t missaanniittut ullaarnganiit unnummut sap ak ullut arfinillit sulisarput. Sulisut assigiinngitsuupput ilaatigut Islandimeersut, Polenimeersut, Danmarkimeersut Nunatsinneersullu, amerlanerpaallu sanaartorfimmi containerini najugaqarlutik. Atuarfittut sanaartukkat qalii kingulliit ikkussorniarlugit suliarineqaleruttorput. Meeqqerivik naammassiliivippoq taannami 2023-mi aasakkut ammartussaavoq. Atuarfittaa 2024-mi aasakkut naammassineqartussaavoq”, Morten Jannerup naggasiivoq.