Politikki Sanaartorneq Services

Naalakkersuisut sanaartornissamut taarsigassarsiat akueraat

Decembarip ulluisa 15-ianni ataatsimiinnermi Naalakkersuisut Kommuneqarfik Sermersooq 1,25 milliardinik taarsigassarsisinnaasoq akuersissutigaat. 

Borgmesteri Avaaraq Olsen oqarpoq: ”Ullumikkut 1.25 mia. koruuninik taarsigassarsinissamut Naalakkersuisunut qinnuteqaatitsinnut akissutisivugut. Naalakkersuisut ippassaq qinnuteqaat akuersissutigaat, Kommuneqarfik Sermersuumullu tamanna nutaarsiassatsialaavoq.  Aningaasanik ullutsinnut naleqquttunik atuarfeqarnissatsinnik meeqqeriveqarnissatsinnillu qulakkeerinnittussanik taarsigassarsinissatta pingaaruteqassusaa Naalakkersuisut takusinnaasimammassuk nuannaarutigaarput.

1,25 milliardit taakku sanaartukkanut tamanut ullumikkut Nuuk City Developmentimit aallartinneqarsimasunut ataatsimut akigitinneqarput. 

”NCD aningaasaliissutissanut taarsigassarsitinnagu imatut iliornikkut iluaqutissartaqarnerusumik aningaasaliineq qulakkeerneqarpoq, taamatullu ernianut allatigullu aningaasartuutissatigut sipaaruteqarfiulluni, tamatumalu innuttaasutsinnut suli pitsaasumik kiffartuussisinnaanerput kingunerissavaa”, borgmesteri Avaaraq Olsen oqarpoq.

Taarsigassarsineq arlalinnik piumasaqaatitaqarpoq. Ilaatigut NCD-p Iserit A/S-illu kattunneqarnerisa suliffeqarfiup illuutaanik attartortunut annerusumik aningaasartuutaassannginnera kommunip qulakkiissavaa. Ilutigalugu Naalakkersuisut kommunip aningaasaqarneranik missingersuutinillu aqutsineranik nakkutiginninnertik annertusissavaat

”Soorunami Aningaasaqarnermut Naligiissitaanermullu Naalakkersuisoqarfiup akuersinerminnut piumasaqaatigisai eqquutsissavagut, Naalakkersuisullu ingerlatsinermi suleqatigilluarsimanerinut qutsavigissavagut. Meeqqatsinnut taakkulu siunissaannut aningaasaliineruvoq annertooq, pingaaruteqartoq pisariaqartorlu”, borgmesteri Avaaraq Olsen naggasiivoq.