Juullip nalaani nunarput tamakkerlugu ikuallattoqarnerusarnera qatserisartuniit misigineqartarpoq. Ikuallannerillu amerlanersaat pinngitsoorneqarsinnaagaluarput. Juullisiorluarnissaq qanoq qulakkeersinnaanerit pillugu siunnersuutit pitsaasut ataani atuarsinnaavatit.
”Ajoraluartumik misigisarparput, decembarip ingerlanerani juulleriartornerani ikuallattoortoqarnerusartoq ukiup sinneranut naleqqiullugu. Ukiut tamaasa ilaqutariit ilaasa angerlarsimaffitsik annaasarpaat, ajornerpaaffianilu ilaqquttamik annaasaqartoqartarluni, taamaattoqartarnerali qujanartumik pinaveersaartinneqarsinnaavoq, isumannaatsumik juullisiornissamut siunnersuut pitsaasut malikkaanni. Neriuppunga ataatsimoorluta nuannersumik isumannaatsumillu juullisiorumaartugut”, Kommuneqarfik Sermersuumi upalungaarsimanermut pisortaq Jes Damgaard Andersen oqaluttuarpoq.
Siunnersuutit pitsaasut sisamat
- Naneruutit nakkutigilluakkit – aamma håndsprittit, saajut allallu ikuallajasuut naneruutit eqqaanisinnaveersaakkit. Naneruutit inissikkit meeqqanit, qimminit qitsunniillu anguneqarsinnaanngitsumut – inilu qimakkaangakku qamittarigit.
- Imermik piareersimasuuteqarit. Kanneq serpartaatitalik atorluarneqarsinnaavoq. Annikitsumik ikuallattoortoqartillugu sodavandi atorluarneqarsinnaavoq. Puiaasamiittoq aalateruk ammaneranilu inussannik assikannerlugu qatserutigineqarsinnaavoq.
- Igaq siatsiviillu kissarsuummiittut nakkutigilluakkit. Orsoq, olie imaluunniit friture ikuallalissagaluarpat: matuguk, taamaasilluni inneq ipisillugu, kissarsuullu qamillugu. Ikuallajasuut kissarsuummut ilinngisaannakkit.
- Angerlarsimaffinni ikuallattoqarneranut qalerrisaarummik ikkussigit – ataavartumillu misilerattakkit.
Juullimut pinnersaatit kransillu
- Kransini kusassaatinilu naneruutit nammineq qamittartut atukkit
- Naneruutip kusernaveeqqutaa sølvpapiriusoq atoruk
- Naneruutit qajannaarsukkit
- Naneruutit isumatusaartumik inissikkit, ikuallalissagaluarpata ikuallajasuunut ungasittussanngorlugit
- Kransi pinnersaatillu isumatusaartumik inissikkit, saajut allallu ikuallajasuut, soorlu avalequtit pinnersaatillu eqqaaniisinnagit
- Naneruut ikuallassinnaanngitsumik allequtsikkit, toqqaannaq nerrivimmut ilinagu
- Isumannaannerpaavoq naneruutit pinnersaatillu avissaarsimatinneqarpata – imaluunniit pinnersaatit ikikkuminaallisakkat atukkit
- Kransi qilaaniit nivingassappat ungerutissiamik nivinganissinneqassaaq, qilerut nalinginnaasut atornagu, taakkumi ikuallapallassinnaammata.
Juullip orpii
- Orpik paninngitsoq atoruk. Nutaajunissaaq orniginarneruvoq.
- Kanaartaa centimeterinik marlunnik kipiguk, orpillu spandimut imertalimmut ilillugu
- Orpik silamiitigut, juulliaqqamilu atorneqalerpat aatsaat eqqullugu
- Orpik eqqunneqareerpat tunngavimmut aalajaatsumut inissinneqassaaq, uppisikkuminaatsumut. Taanna sapinngisamik imermik imaqartiguk taamaasilluni nakkaalavallaassanngimmat
- Qulliit sarfatortut isumannaannerpaapput, naneruutit atussagaluarukkit naneruutit nammineq qamittartut kusernaveequteqartullu atukkit
- Naneruutit inissilluakkit, avalequtinut kusassaatinullu ikitsisinnaajunnaarlugit.
- Eqqaamallugu qattaq imermik imalik imaluunniit kanneq serpartaatitalik eqqaaniititaqartassagavit
- Orpik atorunnaarpat piaarnerpaamik igiguk.
Qatserisartut (upalungaarsimasut) ima attavigisinnaavatit
Nuuk
Pinasuartumik Nuummi qatserisartunit ikiorneqarnissat pisariaqartilissagaluarukku, ikuallattoqarnerani – annaassiniarnissamut – avatangiisini ajutoortoqarnerani Upalungaarsimasut 113-mut sianernikkut attavigisinnaavatit.
Tasiilaq
Pinasuartumik Tasiilami qatserisartunit ikiorneqarnissat pisariaqartilissagaluarukku, ikuallattoqarnerani – annaassiniarnissamut – Avatangiisini ajutoortoqarnerani ikuallattoqarneranut kalerrisaarut qaninnerpaaq tooriartussavat
Ittoqqortoormiit
Pinasuartumik Ittoqqortoormiini qatserisartunit ikiorneqarnissat pisariaqartilissagaluarukku, ikuallattoqarnerani – annaassiniarnissamut – Avatangiisini ajutoortoqarnerani, ikuallattoqarneranut kalerrisaarut qaninnerpaaq tooriartussavat
Paamiut
Pinasuartumik Paamiuni qatserisartunit ikiorneqarnissat pisariaqartilissagaluarukku, ikuallattoqarnerani – annaassiniarnissamut – Avatangiisini ajutoortoqarnerani Upalungaarsimasut 113-mut sianernikkut attavigisinnaavatit.
Bygderne
Nunaqarfinni qatserisartut pisariaqartissagaluarukkut ikuallattoqarneranut kalerrisaarut tooriartussavat, taamaasillutit upalungaarsimasut kalerrillugit.