Services

Borgmesteri: Nutaamik aningaasaliineq – aningaasartuutit nutaajunngitsut

Kommuneqarfik Sermersuup taarsigassarsiatut akuersissutigineqaqqammertut Kommunalbestyrelsimi Naalakkersuisunilu Siumumit politikkikkut akisussaassuseqanngitsumik aalajangiinertut kommunimilu ingerlatsinerlunnertut taallugit saqqummiunneqarput, taamaanngilarli.

Kommuneqarfik Sermersuumiit taamatut taarsigassarsinissaq aalajangiunneqarpoq pissutigalugu aningaasaliiffigisassat pisariallit aningaasaliiffiginissaannut akikinnerpaajummat, tamannalu kommunalbestyrelsimit tamarmiusumit kissaatigineqarnikuuvoq. Kommuneqarfik Sermersuumi borgmesteri Avaara Olsen aalajangiusimalluni oqarpoq.

”Aningaasat atuarfiliornermut meeqqeriviit sanaartornerinut atorneqassapput. Isumaqartoqarpat akisussaassuseqanngitsumik ataqqineqaatiginiarlugu sanaartugaasut taava taakku massakkut atuarfitsinnut pulaaqqullugit aggersarusuppakka pitsaasuunersut ullutsinnullu naleqquttuunersut oqaluttuuteqqullunga. Angajoqqaattaaq qitornami meeqqerivimmiilernissaannut utaqqisut allattorsimaffianniittut aperineqarsinnaapput amerlanerusunik meeqqeriviliortoqassanersoq”, borgmesteri oqarpoq.

Pilersaarutaaqqaartoq tassaagaluarpoq Kommuneqarfik Sermersuup illoqarfimmik ineriartortitsinermut ingerlatseqatigiiffigisimasaa NCD – Nuuk City Development aqqutigalugu taarsigassarsinikkut sanaartukkat aningaasaliiffigineqassasut. Ingerlatseqatigiiffiup pilersinnissaa kommunalbestyrelsip tamarmiusup taperserpaa aamma atuarfiliornissamik meeqqeriviliornissamillu suliakkerneqarpoq. 2021-mi apriilip qaammataani sanaartugassat akilerneqarnissaat siunertaralugu 1,3 milliardinik NCD taarsigassarsissasoq Aningaasaqarnermut Inuussutissarsiornermullu Ataatsimiititap tamarmiusup akuersissutigaa.

Nuummi meeqqat atugaat pitsanngorsarneqassammata aningaasanik taarsigassarsinissaq pisariaqartoq taamanikkut Siumumit isumaqatigineqarpoq. Kingorna naatsorsuineq naapertorlugu paasinarsivoq, kommunimit taarsigassarsisoqassappat akikinnerussasoq, taamaammat Kommuneqarfik Sermersooq Naalakkersuisunut qinnuteqarpoq nammineq taarsigassarsiniarnissani pillugu.

”Matumani aningaasartuutissat nutaat pineqanngillat. Aningaasat pineqartut annertussusaat NCD aqqutigalugu taarsigassarsinissamut aalajangiunneqareersumi nikinngillat, taarsigassarsiallu akilersornissaannut aningaasanik immikkoortitsereerpugut. Taamaammat aningaasartuutit nutaat matumani pineqanngillat. Qaammatialunnguit matuma siorna Kommunalbestyrelsip tamarmiusup aningaasaliissutissatut tapersigaa taannaaginnarpoq. Assigiinngissutaali tassaavoq aningaasaleeriaaseq una atorlugu akikinnerusumik taarsigassarsinerummat”, Avaaraq Olsen oqarpoq.

”Nuummi innuttaasut amerliartortorujussuupput kingunerisaanillu atuarfiit meeqqeriviillu massakkut pisariaqartippavut. Sanaartornermut aningaasanik sipaaginnarluta meeqqat ukiuni 20-ni utaqqisissinnaanngilagut. Taamaammat sanaartukkat aningaasaliiffiginissaannut taarsigassarsinissaq pisariaqarsimavoq, tassami Kommunalbestyrelse tamarmiusoq aalajangermat aallartisarneqassasut, aamma suli ullumikkut pisariaqarput”, taama Avaaraq Olsen naggasiivoq.