Tasiilami inuusuttut kulturikkut illuanni Igdlo-mi, aappassaanik inuusuttumiit inuusuttumut pikkorissartitsinermi timip pisataanut tunngasut, aaqartarneq, nappaatit kinguaassiuutitigut tuniluuttartut sammineqarput.
Kinguaassiuutinut tunngasunik inuusuttumiit inuusuttumut atuartitsinermi siunertaavoq, najukkami inuusuttut inuusuttoqatiminnut pikkorissaanissamut sakkussanik, ilisimasanik siaruarterinerminni atugassaattut. Inuusuttut Igdlo-mi kajumissutsiminnik suleqatigiittartut 20-upput, aamma Majoriamit atuartut kiisalu inuusuttut Siu Tsiu-mit peqataapput.
”Illoqarfimmi inuusuttunut, inuusuttunik atuartitsisoqarluni, inuusuttut imminnut allanillu qanoq paarinissaat, imminnut namminnerlu timiminnik ilisimaarinissaat, pissusissamisoortumik Tasiilami inuusuttut kulturiannut ilaatillugu oqaluuserinnissinnaanerat maligassatut neriuutigalugu isumassarsiaavoq,” Pernille Thorup ’Tasiilami suleqatigiippugut’-meersoq, Igdlo suleqatigalugu pikkorissartitsinermi aaqqissueqataasoq oqarpoq.
Pikkorissartitsineq siulleq upernaami 2021-mi ingerlanneqarpoq, tassani atuartitsinermi timip ilusaa pisataalu sammineqarlutik, inuusuttuaranngorneq, kinguaassiuutinut tunngasut, killissat, imminut tatigineq imminullu naleqartinneq imaritinneqarlutik.
Pikkorissartitsinermi tassani aappassaanik pikkorissartitsisuuvoq peqqissaasoq Sara Pais aamma nakorsaq Morten Ruge, taakku marluullutik ukiorpassuarni inuusuttumit-inuusuttumut kinguaassiuutit pillugit atuartitsinermik misilittagaqartuupput, uanilu pikkorissaanermi timip pisatai sammineqarput, aaqartarneq, nappaatillu kinguaassiuutitigut tuniluuttartut naartunaveersaatillu qulequtaallutik. Peqatigitillugu anguniakkat ilagaat inuusuttut namminneq ilisimasaminnik inuusuttoqatimimmut ingerlateqqiisarnissaannik ilinniartissallugit.
”Inuusuttut uummarissumik apeqquteqartarput, eqimattakkuutaarlutik oqaloqatigiillutik, ilinniakkatik imminnut oqaluttuaralugit nassuiaatigalugillu, allat saallugit nikuillutik oqalunnissaq misilerarlugu, allallu oqaluuserissallugit paquminarsinnaasut oqaluuseralugit. Hold-ivissuanngoramik illaqatigiillutik, ice-breakers aqqutigalugu pinnguarlutik aammalu ilikkagassanut tunngasut pinnguarnikkut ilinniarpaat, aammalu gruppetut ataatsimut akisussaaffeqarnerup isumaa misigilluarpaat, ” Pernille Thorup oqaluttuarpoq.
Pikkorissarnerup saniatigut pikkorissartut namminneerlutik illoqarfimminni inuusuttumit-inuusuttumut pikkorissaasut peqatigiiffiannik aallartitsipput, ateqartoq Isaqqii. Pakkalussap aterivaa, sivisuumik qullugiaaqqaarluni inerikkaangami puuminit pakkaluanngorluni anisartoq. Peqatigiiffimmuttaaq ilisarnaat ilusilersorneqarpoq. Pikkorissarnermi peqataasut tamarmik diplominnapput. Taassuma saniatigut tamarmik jakkemik tunineqarput, tassani allaqqavoq Isaqqii, aammalu gruppip ilisarnaataa mersuussaq jakkimiilluni.
Pikkorissarneq naammassineqarpoq atuartitsisut oqalugiarnerannik, taakkua peqataasut peqataalluarnerat, alapernaannerat aammalu suliassamik sapiillutik tigusinerat nersualaarlugu. Tamatuma kingorna pikkorissartut illoqarfimmi atuarfimmi atuartut 7.-10. klassit pikkorissarnermi ilinniakkaminnik atuartittussaavaat.
