Services

Qaqinikuuvunga!

”Ane” inuusuttuaraalluni paatsiveqanngitsutut inuuneqarsimasoq maanna ilinniarnertuunngorniarfimmi ukiut aappassaa ilinniarnini aallarteqqammerpaa, Anep siumut aallarneranut Inuusuttunik Sullissivik sunniuteqarluarsimasoq Ane oqaluttuarpoq.

Ane, ullumikkut 19-inik ukiulik, meerannguullunili nalusimanngilaa timmisartumi saqisunngussalluni. Meeraallunili ajaannguni timisartumi saqisuusoq nuannaartorisimavaa, ajaaqqanisulli suliffeqarlernissaanut illineq suli ingerlaarfigaa. Aqqulli taanna ingerlaffigilernissaa imaannaasimanngilaq.

Ane inuusuttuaraalluni ikiaroornartoq imigassarlu ajornartorsiutigisimallugit, ullut tamaasa aanngajaarniutinik atuisarsimalluni.

”Inuusuttuaraallunga naalanngeruloornikuugama, paatsiveqarnanga inuullunga. Anaanannut naalassinnaananga, allaat anaanama aqussinnaananga”, ”Ane” oqaluttuarpoq.

Sullissisuniit ikorfartorneqarneq

Ane ullumikkut Nuummi ilinniarnertuunngorniarfimmi ukiut appaassaat ukioq manna aallartippaa. Ilinniarnertuunngorniarfimmi aallartinnginnermini inuunerminik allannguingaatsiartariaqarsimavoq. Tamanna ukioq 2020-mi februaarip 22-ani pivoq.

”Ulloq taanna aalajangerpunga ikiaroornartumik millusseqqinniarnanga. Ukiut pingasunngulerput ikiaroornartoq unitsikkakku”, Ane oqaluttuarpoq.

Ukioq 2020-mi Ane aalajangerpoq meeraallunili takorloortarsimasani anguniassallugu, timmisartumi saqisunngorusulluni. Tamannalu angussaguniuk ilinniarnertuunngortariaqarnissi paasisimavaa.

”Ane” Nuummi Inuusuttunik Sullissivimmit ikorfartorneqarpoq. 18-inik ukioqalerami meeqqat angerlarsimaffianniit anisussanngorami suliniuteqareernermi malitseqartitsinertalimmik Inuusuttunik sullissivimmiit ikorfartorneqalerpoq. Inuusuttut allat najugaqatigalugit nammineq ineeraqalerluni, saniatigut inuusuttunik siunnersortimik attaveqartarluni.

“Taamani oqaloqatigisartagara Ruthi naapissimanngitsuugukku ilimagaara kammalaatigisimasattulli suli inuussagaluarlunga, suli taamaarujoorsimassagaluarpunga, ikiaroortarlunga imiinnaavillunga. Anaananniit anisitaareersimassanngikkuma”, Ane oqarpoq.

”Ukioq 2020 uannut siumut alloriarfiuvoq tupinnartoq. Ikiaroornartoq unitseriarlugu Majoriamut qinnuteqarpunga, ukiorlu ataaseq ataallugu naammassillugu, naammassereerakkulu GUX-imi aallartippunga”, Ane oqaluttuarpoq.

Tupigusunneq tulluusimaarnerlu

Ane sivisuumik paatsiveqanngitsutut inuusuttooreerluni maanna illineq ingerlaffigisani tulluusimaarutigalugu oqaatigaa.

“Inuunera allanngoruloornikuuvoq. Kingumut qiviassaguma, tupigisarpara ullumikkut inuunera tassunga killissimammat. Nakkaasimaruloornermiit siumut ingerlalersimanera tulluusimaarutigaara”, Ane unnersiorpoq.

Ane, inuusuttullumi allat Inuusuttunik sullissivimmiit ullut tamaasa ikorfartorneqartarput. Inuusuttut pisariaqartitaat aallaavigalugit qanoq ikorfartuisoqassanersut inuusuttut aammalu inuusuttunik sullissisut akunnerminni isumaqatigissutigisarpaat.

Assersuutigalugu Anep najugaqataalu ataasinngornermiit tallimanngormut ullaat tamaasa alakkarneqartarput, paasiniaavigalugit qassinut atuariartussanersut, qanoq atuariartussanersut, bussissanersut imaluunniit biiliussassaanersut.

Taakku saniatigut Anemut tulluarsakkanik Ane siunnersuisunilu isumaqatigiissusiorsimapput. Ataasinngornermi Ane siunnersuisunilu naapeqatigiittarput, naapeqatigiittarnerlu qanoq ittuussanersoq Anep inuttut inissisimanera aallaavigalugu inissittarpaat. Soorlu itinerusumik oqaloqateqarnissani pisariaqartinneraa imaluunniit cafeerujoornissartik orniginartinneruneraa.

Taava pingasunngornikkut rusmiddelbehandlerimiittarpoq, sisamanngornikkut efterværnertut ataatsimoorlutik sammisaqaqatigiittarlutik.

“Pisariaqartitakka aallaavigalugit ikiorneqarluni iluaqaaq! Nukissaninnartaqaaq qamuuna, nalunagu tapersersortigisannik saninniittoqartoq, kisimiinnanga nalunagu”, Ane oqaluttuarpoq.

”Ane” taajutaavoq, Anep kinaassusaa attaveqaqatigiinnermik immikkoortortami ilisimavarput.

Ane assigalugu ikorfartorneqarnissamik pisariaqartitsiguit, Inuusuttunik Sullissivik attaveqarfiginissaanut tikilluaqqusaavutit.

Ungecenter Nuuk

Saqqarlernut 14
Postboks 1005
3900 Nuuk
kommuneqarfik@sermersooq.gl
+299 36 69 29 / 53 49 79

Sulinuteqareernermi malitseqartitsinermik neqeroorutit marluk ukuninnga imaqarput:

  1. Najugaqarfissamik tapersersorneqarnermillu neqeroorut, inuusuttunut ineeqqamik inissaqarlunilu tapersusisussaqarluni, aamma suliniuteqareernermi malitseqarnermi sulisumik attaveqarneq
  2. Inuusuttunut ineeqqamik inissaqartitsinani suliuniuteqareernermi malitseqartitsinermi sulisumik tapersersuineq attaveqarnerlu.

Suliniuteqareernermi malitseqartitsinermik neqeroorutik saniatigut Inuusuttunik Sullissivik ukuninnga aamma neqerooruteqarpoq:

Meeqqanik 6 -14-inik ukiulinnik sakkortuumik nalaataqarsimasunik katsorsaaneq. Katsorsaaneq meeqqanut sakkortuumik nalaataqarsimasunut tassani sumiginnagaaneq, kinguaasiuutitigut kannguttaatsuliorfigineqarneq, persuttagaaneq, toqukkut annaasaqarneq assigisaanulluunniit tunngatinneqarpoq.

Inuusuttunut 10 – 18 ukiulinnut inuttut, ilaqutariittut, inooqataanikkut imaluunniit ilinniagaqarnikkut unamminarsinnaasunik tunngasunik inuusuttunik siunnersuineq.

Inuusuttunut 23-t tikillugit ukiulinnut aanngajaarniutinik katsorsaaneq isumaginninnermi perorsaanikkut tapersersorteqarluni atornerluinikkut ileqqut allanngortinnissaannut kajumissaarneqarluni imaluunniit ikiorserneqarluni peqqissumik inuuneqalernissamut ineriartortitsissaaq.

Ammasumik kinaassutsimik isertuussisumik inuusuttunut siunnersuineq Nuummi inuusuttunut tamanut angajoqqaavinullu neqeroorutaavoq. Neqeroorut inuusuttunut siunnersorneqarnissamik aamma aqqutissiuunneqarnissamik ajornartorsiutinut assigiinngitsunut isumaginninnissamut pisariaqartitsisunut tunngatinneqarpoq. Ammasumik kinaassutsimik isertuussisumik siunnersuisarfik sisamanngornerit tamaasa nal. 14-18 ammasarpoq, najukkanilu marluusuni takuneqarsinnaalluni: Farip Aqqutaa 10 aamma Saqqarlernut 14.