Kommuneqarfik Sermersuup ukiortaamiit peqatigiiffinnut tapiissutit pillugit maleruagassat nutaat atuutsilissavai. Tamatuma kingunerisaanik peqatigiiffippit aningaasanik amerlanerusunik tapiiffigineqarnissaa ilimanaateqarluinnarpoq, kisiannili tamanna pissappat aamma peqatigiiffinnut ilaasortanullu nutaanik piumasaqaateqarpugut.
Siunissami peqatigiiffiit tamarmik ingerlatsinermut tapiissutinik pissarsisinnaalissapput, kisiannili peqatigiiffik ingerlatsinermut tapiiffigineqassaguni, kommunip sunngiffimmi sammisaqartitsinermut iserfissiaani, sammisassat.gl, nalunaarsorsimasussaavoq. Kommunimi peqatigiiffiinut ingerlatsinermut tapiissutissatut agguagassat 870.000 koruunit immikkoortinneqarput.
Ingerlatsinermut tapiissutit saniatigut aamma ilaasortanut tapiissuteqarpoq, taamaalillunilu peqatigiiffiit amerlanerusunik ilaasortallit amerlanerusunik tapiiffigineqartassapput. Tapiissutinik taamaattunik tunineqarnissamut ilaasortat uani: sammisassat.gl, nalunaarsorsimanissaat piumasaqaataavoq. Peqatigiiffinni ilaasortat nittartakkami ilaasortat allattorsimaffiannut ilanngussinnaapput aatsaat peqatigiiffiup ilaasortani nittartakkakkut ilaasortanngorsinnaanerannik periarfissiisimappat.
Kommunimi ilaasortanut tapiissutissatut agguagassat 1,3 millioner koruunit immikkoortinneqarput.
Angalanerit nalinginnaasumik peqatigiiffinni annertunerpaamik aningaasartuuteqarfiusarput. Taamaattumik kommunimi peqatigiiffinnut angalanernut tapiissutissatut 6,5 millioner koruunit immikkoortinneqarput. Peqatigiiffiit ukiup tulliani angalanissanut tapiiffigineqarnissamut qinnuteqassappat, tamanna ukioq manna 1. decembari nallertinnagu pissaaq.
Peqatigiiffiit uani immersugassaq: immersorlugu angalanernut tapiissutissanik qinnuteqarsinnaavoq, taannalu uunga nassiunneqassaaq: peqatigiiffiit@sermersooq.gl
Peqatigiiffiit tapiissutissanik qinnuteqarnermini ikiortariaqarpat, Sunngiffimmi Sammisaqartitsinernut Immikkoortortaqarfik ikiuunnissaminut piareersimavoq. Oqarasuaat: 36 75 30 imaluunniit e-mail: peqatigiiffiit@sermersooq.gl
Peqatigiiffinnut tapiissutit pillugit maleruagassat nutaat pillugit podcasti uani tusarnaarsinnaavat imal. isiginnaarsinnaavat.
Peqatigiiffinnut tapiissutit pillugit maleruagassat nutaat pillugit uani flyerinngorlugit / plakatinngorlugit takukkit