Services

Meeqqanut pensionisialinnullu akeqanngitsumik bussinut ilaaneq

Pensionisiallit meeqqallu 16-it inorlugit ukiullit ukiortaap kingornagut Nuummi illoqarfiup bussiinut ilaassagunik, aningaasivitsik kaasarfimminniit ammuttariaaruppaat. Missingersuutini kommunalbestyrelsimit akuersissutigineqaqqammersuni angusat ilagaat, pineqartunut taakkununnga bussinut ilaaneq akeqarunnaassammat.

”Angallanneq ilaqutariipparsuarnut meerartalinnut pensionisialinnullu akisuujuvoq. Ullumikkut qaammammut ilaassutissanik pisisimasut, aningaasanik namminneq atugassaminnik amerlanerusunik atugassaqalissapput, taavalu billettinik pisisut, maannakkut akulikinnerusumik bussinut ilaasalissapput. Tamanna politikkikkut angusaavoq uannut nuannerluinnartoq”, Kommuneqarfik Sermersuumi borgmesteri Avaaraq Olsen oqarpoq.

Ullumikkut ilaassutissat kortit qaammat ataaseq atuuttussat 578 koruuninik aamma 276 koruuninik akeqarput, taavalu billettit 9 koruuniniit 21 koruunut akeqarlutik.

Kommunalbestyrelsip meeqqat pensionisiallillu akeqanngitsumik bussinut ilaasalernissaannut ukiumut 6 millioner koruunit immikkoortippai.  Akeqanngitsumik bussinut ilaasalernissaq qanoq uppernarsaatissaqartinneqassanersoq, decembarip qaammataata ingerlanerani nalunaarutigineqarumaarpoq.