Anerikamiut pattattartoq eqqumiitsuliortutullu tamatigoortoq Jim Milne Kommuneqarfik Sermersuumi 2023-mi kulturikkut nittarsaassisunngorpoq.
QarQ-mi rock-imik nipilersoqataasarsimavoq, Josef Josefsen aamma Ida Heinrich operamik erinarsornerini ingiallortaasarsimavoq aammalu akuttunngitsumik pingasuusartoqatinilu jazz-imik tusarnaartitsisarput. Kalaallit Nunaannut tikikkamili Nuummi nipilersornerup silarsuaani nammaqataasimavoq, aammalu Jim Milne tallimanngornermiit imminut Kommuneqarfik Sermersuumi 2023-mi kulturikkut nittarsaassisutut taasinnaalerpoq.
Nersornaat siullermeersumik inummut, Kalaallit Nunaanni inunngorsimanngitsumut tunniunneqarpoq, nersornaasiinermilu Atugarissaarnermut Suliffeqarnermullu Ataatsimiititaliami siulittaasoq Inge Olsvig Brandt oqalugiarami oqarpoq, tamanna Jim Milne-p Nuummi kulturikkut inuunermi qanoq pingaaruteqartigineranik takutitsisuusoq.
”Eqqumiitsuliortuuvutit tamatigoortoq, assilialiornermiit nipilersornerup silarsuaani assiginngitsorpassuarnut piginnaaneqarfeqartoq. Tunniusimalluarnerit annertuvoq siaruaattarlunilu. Nalinginnaasumik nersornaat manna inummut, kalaallit kulturianik nittarsaassisumut, aammalu nunatta avataanut siaruartitsiniarluni suliniuteqartumut tunniunneqartarpoq. Illit killormorluinnaq iliorsimagavit ullumikkut nersornaaserpatsigit. Nunatsinnut tikissimavutit. Kulturerput pigiliussimavat, aammalu tiguserusuttunut tamanut siammarterniarlugu aalajangersimavutit. Nunatsinni nipilersortartut arlaataluunniit atia tusarnaartitsinissanut allagartarsuarni assigiinngitsuni taama amerlatigisuni allassimasimanngilaq. Taamaalillutit misilittakkatit isiginnaartunut nipilersortartunullu allanut siaruartersimavatit”, Inge Olsvig Brandt oqarpoq.
Tamatumunnga peqatigitillugu erseqqissaavoq, Jim Milne nunatsinni kulturitta nittarsaanneqarnerani annertusititseqataasimasoq.
”70-ikkunni Reno-mi pattattartutut ilisimatusarfimmi ilinniarsimallutit nunatsinnut peqqaaravit qanoq eqqarsarsimanersutit takorlooruminaatsippara. Tamaani jazz-ertartut peqatigiiffeqanngilaq, tusarnaartitsisarfissuarnik soqanngilaq, aammalu nipilersortakkannik tusarnaarusuttut amerlasimassanngillat, tamannali uniffiginngilat. Kalaallit nipilersortarnerannut pulavutit, ikittuinnaallu pisarnerattut tapertaalerputit, annertuunillu suliniuteqarnikkut kalaallit nipilersortarnerannut nuannernerulersitsivutit, aammalu nipilersukkanut illeqarsimanngitsuuppat tusarsinnaanngisaraluatsinnut siutigut ammarpatit, Inge Olsvig Brandt oqarpoq.
Jim Milne-p nersornaat tigugamiuk ersarissumik killitsisimavoq.
”Nersornaammik tigusinissannut piareersaraluarpunga. Maannali maani nikorfaninni killitsisimaqaanga. Nersornaatit kusanartut anguniarlugit nipilersoqataasanngilanga. Nipilersoqataasarpunga, meeqqat inuusuttullu nipilersornermik ilinniartut isiginissaat nuannarilluinnarakku”, kulturikkut nittarsaassisunngortoq oqalugiarnermini oqarpoq.