Arsarnerit Inuusuttai tallimanngormat novembarip aqqarnganni Sisimiuni ingerlanneqarpoq. Aaqqissuussaq Kalaallit Nunaanni meeqqat atuarfianni atuartut nutaaliorluni aallarnisaanermik pissartanngorniuunnerusutut eqqaanarpoq. Klassit Nuussuup Atuarfianeerssut ajugaapput Atuarfik Hans Lyngemeersullu 2-ngorlutik.
Atuartut iligiiaani marluusuni 19-it 1. præmia unammissutigaat, taannalu tassaavoq Danmarkimut unammiartornissaq. Atuartut avannaaniit Qaanaamiit kujammut Qaqortumit peqataapput. Peqataasullu Nuussuup Atuarfianeersut ajugaapput Atuarfik Hans Lyngemeersullu 2-ngorlutik.
”Inuusuttut nutaaliornermut aallarnisaanermullu soqutiginninnerat nuannaarutigaara. Tamanna siunissami iluaqutaanissaa qularnanngilaq. Ajugaasunut Nuussuup Atuarfianeersunut aammalu 2-ngortunut Atuarfik Hans Lyngemeersunut pilluaqquserusuppunga”, borgmester Avaaraq Olsen oqarpoq.
Ukioq manna unammisitsisoqarnerani ”Aalasa” qulequtarineqarpoq, taannaavorlu Kalaallit Nunaanni Timersoqatigiit Kattuffiata suliniutaa, nunarsuarmi Kalaallit Nunaat 2030-mi timimik aallatitsinerpaanngornissamik anguniagaq. Tamatuma angunissaanut inuusuttut isumassarsiaminnik saqqummiussaqarput.
Ajugaasut Nuussuup Atuarfianeersut isumassarsiaat tassaavoq, unammisut arsamik putunut ikisiniarneq, arsarlu putukkut ikeriaraangat timimik aalatitsinissamut sungiusaatinik makitsisarneq. Atuartut meeqqerivimmut pulaarsimapput unammissut misilittarniarlugu, angusaqarfiulluartumik. Allorianeq tulliuttoq tassaavoq, unammissutip utoqqarnut tulluarsarnissaa. Taamaasiornikkut unammisutip tamanit aamma atorneqarsinnaanissaa anguniarlugu.
Iligiit Atuarfik Hans Lyngemeersut systemiliorsimapput, tassani QR-kodet scannerneratigut timi atorlugu sungiusaatinik isumassarsiassanik aallertoqarsinnaalluni, atuartut atuartinneqarneranni aammalu inersimasut suliffimminni atorsinnaasaannik.
Ukioq manna unammisitsisoqarnerani soqutiginnittoqarluarsimavoq, Sisimiuni innuttaasorpassuit atuartut isumassarsiaminnik saqqummiinerannut isiginnaariarsimapput.
”Inersuaq ulikkaavippoq, ingammik meeqqanut inuusuttullu amerlasuut najuupput ajugaanniuutivinneq ingerlanneqarnerani”, Nukappiaraq Kristiansen, Fonden for Entreprenørskab Kalaallit Nunaanni junior konsulent taama oqarpoq.
Ukiumoortumik aaqqissuussisarnerup siunertaraa, inuusuttut ulluinnarni unammilligassanut qanoq-iliornikkut anigorneqarsinnaanerinik isumassarsiorlutik suliaqartarnissaat. Meeqqat inuusuttullu nutaaliorluni aallarnisaanermut piginnaasaasa siuarsarneqarnissaat ukkatarineqarpoq, aammattaaq meeqqat atuarfiini ilinniarfinnilu nutaaliorluni aallarnisaanermut ilinniartitsinissaq neqeroorutigineqarluni.