Ataasinngornermi 14. novembarimi Kommuneqarfik Sermersooq Iqalunnit Nunavummiittumit kalaallisuuliortartunit tikeraarneqarpoq.
Aallartitat ammerivik Kittat pulaarniarlugu Nuummiipput. Tassami Iqalunni kalaallisuuliortarfimmik pilersitsinissaq pilersaarutigineqarmat, Kommuneqarfik Sermersuup isumassarsiorfiginissaa aalajangiunneqarsimavoq, Issittumi kommunit ikittuinnaat kalaallisuuliortarnermik tammatsaaliuiniarluni suliniuteqartut ilagimmassuk.
”Akuttunngitsumik nunatta marluusut suleqatigiinnissaat oqaluuserisarparput, kisiannili qaqutiguinnaq oqaluuserisat piviusunngortinneqartarput, qulequtarli manna naggueqatigiittut suleqatigiissutigisinnaavarput. Kitaani naggueqatitta kommunitsinni suliagut paasisimagaat takullugu nuannerpoq”, Atugarissaarnermut Suliffeqarnermullu Ataatsimiititaliap siulittaasua aallartitanik tikilluaqqusinermini oqarpoq.
Kommunalbestyrelsip ataatsimiittarfiani tikilluaqqusisoqareermat Kittat Nuup Saavaniittoq orninneqarpoq, tassanilu Nuummi Iqalunnilu mersortartut erngerlutik suleqatigiillutik aallartipput, qapiariaatsit, allapalaareriaatsit mersoriaatsillu pillugit avitseqatigiillutik.
Amminik mersorneq kommunalbestyrelsip pingaartittorujussuuaa. Ullumikkut Nuummi, Kapisilinni Qeqertarsuatsiaanilu amminik mersortarfeqarpoq, ukiullu tulliani Tasiilami amminik mersortarfimmik ammaasoqassaaq.
Mersortartut Iqalunneersut Kittani misigisatik pikkugisorujussuullugit oqarput, aammalu siunissami qanittumik suleqatigiinnissartik kissaatigaat.