Atuarfeqarneq Piorsarsimassuseq

Atuarfimmi qilaatersorneq kulturilu

Nuummi 3. klassit sapaatit akunnerini tulliuttuni marlunni qilaatersornermik tamatumunngalu atatillugu kulturimik aallussipput.

Nuummi Nipilersornermik Ilinniarfiup aamma Meeqqanut Atuarfinnullu Sullissivik suleqatigiinnerisigut isiginnaartitsisartoq eqqumiitsuliortorlu Kuka Fleischer Qilaat pillugu atuartitsivoq.

“Aallaqqaammut meeqqat tunuarsimaalaarput, kisiannili qilaatersornermik sungiusaleramik nuannisartut takuneqarsinnaavoq. Arlallit saniatigut ilinniartinneqarsinnaanerlutik aperisarput, kisiannili atuartitsineq Qilaat pillugu ilisimasassanut naammassasoq isumaqarpunga. Maanna tamarmik kulturikkut illorsuup Katuap atini suminngaanniit pissarsiarisimaneraa ilisimalerpaat”, Kuka Fleischer oqaluttuarpoq.

Qilaat pillugu atuartitsinermi nalinginnaasumik oqalugiartoqarpoq, kiisalu qilaatersorneq pillugu assitoqqat filmiliaaqqallu takutinneqarlutik,  misiliititsisoqarlunilu. Atuartut nammineerlutik qilaatersorlutik misilippaat,  qilaatersorlunilu inngerneq qanoq ingerlanneqartarnersoq ilinniarlugu.

Atuartitsinissamut kajumissuseqalersitsisut arlaliusimasut Nuummi Nipilersornermik Ilinniarfiup pisortaa Pipaluk Lynge Berthelsen oqaluttuarpoq: “Qilaatersorneq aallunniarlugu aalajangerpugut, kalaallit kulturikkut nipilersornikkullu kingornussatta pingaarutillit ilagigaat isumaqaratta. Qilaat suunersoq aammalu qanoq atorneqartarnersoq meeqqat ilisimalertariaqarpaat. Oqaluttuarisaaneq, kisiannili aamma ullumikkut qanoq sunniuteqartarnersoq eqqarsaatigalugu. Taamaattumik oqaluttuarisaaneq, nipilersornermik ilinniartitsineq, kulturimik eriaginninneq aammalu ullumikkut qilaatip Kalaallit Nunaanni atugaaneranik nalinginnaanngorsaaniarneq akuleriissitsineruvoq pitsaasoq.”

3. klassini nuannisartoqarnera nuannarilluinnarpaa, aammalu Meeqqanut Atuarfinnullu Sullissiviup suleqatigineqarnera nuannaarutigalugu, suliassallu klassini taakkunani atuartitsissutitut aalajangersimasutut ilaalernissaat takorloorpaa.

“Kuka Fleischer-ip meeqqanik atuartitsinera nuannarilluinnarparput, neriuppugullu sammisaq siunissami 3. Klassinik atuartitsinermut arlaatigut aalajangersimasumik ilaalersinnaassasoq”, Pipaluk Berthelsen naggasiivoq.

Matuma kinguliani atuartitsinermit assit takuneqarsinnaapput.