Katsorsaasut, sullissisut inunnillu isumaginnittut amerlanerit, aammalu utoqqarnut nerisassanik pajuttarneq. Tamakkuupput ukioq manna missingersuutini sanngiinnerusunik sullissinermi tigussaasumik angusat ilaat.
Partiit suleqatigiit ukioq manna missingersuutini innuttaasunik kiffartuussinerup pitsanngorsarneqarnissaa pingaartippaat, taamaasillutik innuttaasut tamarmik inuunerinnerulernissaannut sinaakkusiillutik.
Piffissami missingersuusiorfiusumi utoqqaat puiguttortunngortullu sullinneqarnissaannut 12 millioner koruuninik immikkut aningaasaliissuteqartoqarpoq, taavalu meeqqanut ajornartorsiuteqartunut ikorsiisarnerup pitsanngorsaaffigineqarnissaanut 12 millioner koruuninik immikkut aningaasaliissuteqartoqarluni.
Meeqqanik sullissinermi Nuummi ilaqutariinnut sullissivimmi katsorsaasut pingasunik ilanissaannut aningaasaliissutit atorneqassapput, oqartussaaffeqarfimmi sullissisut pingasut, taavalu sullissisoq aamma ataaseq piffissami suliniuteqarfiusumi ukioq ataaseq angerlarsimaffiup avataanut inissiisarneq kisiat suliaralugu sulisussaq. Tamatuma kingunerissavaa, inuusuttut amerlanerit ilaqutariinnut sullissivimmut katsorsartikkiartortalernissaat, aammalu meeqqanik sullissinermut tunngasuni pitsaassutsip qaffanneqarnissaa.
“Meeqqat ajornartorsiuteqartut sullinneqarnerat uagutsinnut pingaarutilerujussuuvoq. Meeqqat ajornartorsiuteqartut pitsaasumik pilertortumillu kiffartuussinnaasariaqarpavut. Taamaattumik iluarisimaartorujussuuara, tamassuma tungaatigut immikkut aningaasaliissuteqarsinnaagatta”, Kommuneqarfik Sermersuumi borgmesteri, Avaaraq Olsen oqarpoq.
Utoqqarnik sullissinerup tungaanut utoqqaat pitsaanerusunik nerisaqartinneqalissapput, amerlanerusunik angerlarsimaffimmi ikiorteqalissaagut aammalu puiguttortunngorsimasunut amerlanerusunik iluaqusersuuteqalissalluta.
“Uannut pingaaruteqarpoq, utoqqaat pitsaasumik inuuneqassappata pitsaasunik sinaakkuteqartinneqarnissaat, matumanilu aningaasaliissuteqarnikkut tamatuma tungaanut eqqortumik alloriartoqarpoq”, Avaaraq Olsen oqarpoq.