Kommuneqarfik Sermersuumi Kommunalbestyrelsip ukiumut tulliuttumut missingersuusiani ullumikkut akuersissutigai.
Missingersuutit katillugit 2,2 milliarder koruuninik aningaasartaqarput, 2023-milu kommunimut akileraarut allannguuteqartinnagu 26%-iussasoq aalajangiusimaneqarpoq.
Partiit suleqatigiit marluusut IA aamma Naleraq missingersuutinut akuersisuupput, Demokraatit aamma Siumut akerliusut.
”Missingersuutit akuersissutigineqartut tulluusimaarutigaakka. Borgmesteritut missingersuusiatut suliama siullersaraat, missingersuutaappullu kommunip eqqortumik ingerlanissaanut tikkuussisuusut. Naatsumik oqaatigalugu missingersuutini ukkatarineqartut tassaapput innuttaasut, pitsaasumillu inuuneqarnissamut sinaakkutissanik pitsaanerusunik pilersitseqataasut”, borgmesteri Avaaraq Olsen oqarpoq.
Piffissami aggersumi partiit isumaqatigiissuteqartut sakkortuumik ukkatariniarpaat kommunip qanimut susassaqarfiini kiffartuussinerit, meeqqanik paarsineq, meeqqat atuarfiat aammalu utoqqarnik isumassuineq. Piffissami missingersuusiorfiusumi 12 millioner koruunit immikkut utoqqarnik puiguttortunillu sullissinissamut immikkoortinneqarput, taavalu meeqqat atugarliortut ikiorserneqarnerisa pitsanngorsarnissaanut 12 millioner koruunit immikkut immikkoortinneqarput.
Aningaasat amerlanerit perorsaasunik ilinniartitsisunillu ilinniarsimasunik atorfinitsitsinissamut atorneqassapput, ulluuneranilu neqeroorutini sulisut ilinniagaqarsimanngitsut piginnaanngorsarneqassallutik. Immikkoortitsiffigineqartunut ilaavoq flyverpædagoginik atorfinitsitsinissamut 24 millioninik aningaasartalik, taakkua kommunimi meeqqerivinni pitsaanerusumik perorsaanikkut imaqartitsinissaq qulakkiissammassuk.
Ukiuni kingullerni Kommuneqarfik Sermersooq sanaartugassanut annertuunut arlalinnut aningaasaliissuteqarsimavoq, missingersuutinilu qaffasissumik sanaartortoqarnissaa siunniunneqarpoq. Nuummi illoqarfiup qeqqani atuarfiup, meeqqeriviup aamma AKO-p naammassillugit suliarnissaannik pilersaarutit. Peqatigitillugulu Paamiuni Tasiilamilu inissialiornissamut aningaasaliissuteqartoqarpoq. Paamiuni nutaamik tigooraaviliornissaq aallartinneqassaaq, Tasiilamilu nutaamik utoqqaat illuliornissamut misissueqqaarneq aallartinneqassalluni. Ittoqqortoormiini nutaamik betonimik aqqusinniortoqassaaq aamma nutaamik utoqqarnut najugaqarfiliornissamut misissueqqaarneq aallartinneqassalluni.
Partiit isumaqatigiissuteqartut kissaatigaat, innuttaasunut amerlanerusunik inissialiortoqassasoq, tamannalu pillugu 2023-mi nammineq inissialiornissamut 115 million koruuninik illuartitsilluni.
Partiit suleqatigiit taakkutuaallutik ukioq manna missingersuutit pillugit isumaqatigiissuteqarnermut atsiortuusut. Borgmesteri neriuppoq tamanna ataasiaannarluni pissasoq.
”Maannakkut immitsinnut ungasissorujussuuvugut, kisianni februaarimi ataatsimiittarfimmut uteqqikkutta, neriuutigaara, ukioq suleqatigiinnerup aqqani aallartikkumaaripput. Kissaatigaarami upperalugulu ataatsimoorfivut avissaartuutigisatsinnit amerlanerusut”, Avaaraq Olsen oqarpoq.