Ina Hansen 17-inik ukiulik sulinermut sungiusarluni Sermersuup Qatserisartoqarfiani Nuummiittumi sulivoq. Aprilimiilli sulinermik sungiusarnini aallartikkamiuk inuttut sulisinnaassutsikkullu ineriartuutigisimavaa. Qatserisartoqarfimmilu sulinini nuannaarutigeqaa, 18-iluugunilu qatserisartut ilinnialernissani aamma siunniussimallugu.
Taamani Inap angajoqqaarsiani ilagalugit Majorialiarpoq ikiorneqarusulluni. Taamalu Ina sulinissamut sungiusarsinnaanerminik innersuunneqarpoq, Inallu qularutiginngivippaa sumiikkusunnini.
”Meeqqat atuarfianniikkallarama, suliffimmik misiliillunga qatserisartoqarfimmiippunga. Puigunngisaannarparalu. Nuannareqaaralu. Taava Majoriarmiup suliffimmut sungiusarsinnaaninnik innersuummannga qatserisarfik pileritsaappara ittuallu aperalugu aallartissinnaanerlunga, ingerlaannarlu akuersipput”, Ina Hansen oqarpoq.
Inap suliffimmut sungiusarnini Aprilimi aallartippaa. Sungiusagaanullu ilaapput suliffimmi akisussaassuseqartumik suleqataasinnaaneq imminullu akisussaaffigisinnaaneq. Qatserisarfimmilu suleqataasa malugisinnaavaat Ina sulinerminut tunniusimaqqissaarluni sulisoq.
“Ina nuannareqaarput. Inap suliassat isumagilluarpai, ittoorpiarunnaarlunilu. Peqqussutaasut qaangerlugit sulerusunnerusaraluarpoq, ilaanni suli sulerusukkaluartoq aninissaanik eqqaasissinnaasarlutigu, tassa Ina taamak tunniusimatigaaq. Maaniinnini ineriartuutigeqaa, aamma inuttut”, qatserisartoq Leif Brandt taamak oqarpoq.
Ersarissunik suliassat immikkoortiterneqartarput, Inalu aamma suliassaqartarpoq. Ulluinnarni qatserisartoqarfimmi Ina suliassaqartarpoq, ilaatigut atortunik misissueqqissaartarluni, ajunnginnersut misissorlugit. Massakkoqqissaarlu qatserisartuni aqutsisut sungiusarnermi atugassaannik suliaqarpoq.
Ina 17-iinnarnik ukioqarpoq, taamaammallu aamma killilimmik suliaqarsinnaalluni. Qatserisartutut ilinniartut sungiusarnerannut peqataasinnaasarpoq, soorlu serpartaatinik atuinermut allatigullu qatserisartuunermut atortut sungiusarneqarnerinut, innernik minnerusunik qamitsiniarnernut allatigullu. Inallu aamma oqaatigaa, qaammat kingulleq annaassiniarnermut peqataanikuusimalluni, inuit marluk Ukkusissami ammukarneq ajulersut annaanniarnerinut.
Majoriaq aqqutigalugu sulinermut sungiusarneq Ina Hansenip sulisinnaanermut inuttullu iluaqutigilluarsimavai, Inap qatserisartullu Leif Brandtip oqaatigaat. Inap qatserisarfimmi sulinini nuannaraa, 18-iliigunilu ukioq manna qatserisartutut ilinnialernissaminut qinnuteqassamaarpoq.
”Inap suliffimmillu misiliinera assersuutitsialaavoq sinnattunik piviusunngortitsisoqarsinnaaneranut. Qanorluunniit suliniarnikkut ajornartoorfeqartarsimagaluaraanni. Inap ineriartorluni ingerlanera nuannaarutigeqaarput”, Nuummi Majoriami centerlederi Malik Skifte taamak oqarpoq.
Sulinermut sungiusartunngorusukkuit Illoqarfigisanni Majoriaq attavigisinnaavat.
Uanilu illoqarfigisanni Majoriaq nassaarisinnaavat.