Kommunalbestyrelsi aalajangerpoq, Meeqqanut Atuarfeqarnermullu Ingerlatsiviup misissugaa Sermersuup atuarfiini inuussutissarsiutit tunngavigalugit atuaqatigiinnik pilersitsinissaq qanoq periarfissagissaartiginersoq.
Atuartut tamarmik meeqqat atuarfianni naammassigaangamik inuusuttut ilinniarfiinut ingerlariaqqinnissaminnut piareersimasariaqarput. Inuit Ataqatigiit Naleqqallu Kommuneqarfik Sermersuup kommunalbestyrelsianni suleqatigiinnissamut isumaqatigiissutaanni tamanna naqissuserneqarpoq. Atuartut suliffinni misiliiffinni imaluunniit inuussutissarsiornermik ilinniarfinni ingerlariaqqinnissartik piareersimaffigissavaat. Politikkerit anguniakkaminnik suliaqarneranni kommunimi suliffeqarfiit peqataatikkusuppaat. Naak sanaartortut sulisussaaleqigaluartut inuusuttut inuussutissarsiornermik ilinniarfinni aallartittartut suli ikippallaarput. Tamaattumik atuarfinni inuussutissarsiornermik tunngavilikkanik atuaqatigiinnik pilersitsisoqarnissaa maanna ingerlanneqarnialerpoq.
”Anguniagaraarput inuusuttut amerlanerusut ilinniakkamik aallartitsisarnissaat. Inuussutissarsiornermik suliaqartut sulisussanik amigaateqarput, uagullu kommunalbestyrelsitut suliassaraarput meeqqat meeqqat atuarfiinni ineriartornissaannut pitsaasunik sinaakkusersuissalluta. Taamaammat isumaqarpugut inuussutissarsiornermik tunngavilinnik atuaqatigiinneq pilersitsinissaq suliniutaasoq pitsaasoq, atuartunut inuussutissarsiornermillu suliaqartunut iluaqutaasussaq”, Meeqqanut Atuarfeqarnermullu Ataatsimiititaliami siulittaasoq Juaaka Lyberth taamak oqarpoq.
Inuussutissarsiutit tunngavigalugit atuaqatigiit 9. aamma 10. klassini atuartunut neqeroorutaassaaq. Ullut tamaasa klasselokalimiittarneq piinnarnagu atuartut assassorluni sulineq aammalu suliffeqarfinni misiliineq ingerlattassavaat. Taakku suliniutit piareersaataassapput, atuartut meeqqat atuarfianni naammassigunik inuussutissiornermik ilinniarfinnut ingerlaqqinnissaannut.
Taamaattumik Meeqqanut Atuarfeqarnermullu Ingerlatsivik kommunalbestyrelsimut inassuteqarpoq, inuussutissarsiutit tunngavigalugit atuaqatigiinnik pilersitsinissami ilusissaatut aallaaviusussamik misissueqqaarnerup suliarineqarnera akuersissutigineqassasoq.
”Una sammisaq pillugu atuarfinni aqutsisut oqaloqatiginikuuavagut, taakkulu isumaqarput inuussutissarsiutit tunngavigalugit atuaqatigiinnik pilersitsinissaq pisariaqartinneqartoq. Taamaattumik suleriaqqinnissatsinnut qilanaarpugut”, Meeqqanut Atuarfeqarnermullu Ingerlatsivimmi pisortaq Lone Nukaaraq Møller taama oqarpoq.
Meeqqanut Atuarfeqarnermullu Ingerlatsivimmiit suliarineqartussaq tulliuttoq tassaavoq, atuarfik pillugu inatsisip atuuttup iluani aaqqissuusineq qanoq inissaqartinneqassanersoq, imaluunniit misiligutitut aaqqiissuussiffigineqarnissaa ingerlanneqassanersoq. Aamma misissuiffigineqartussanut ilaavoq suliffeqarfiit inuussutissarsiornermillu ilinniarfiit ilinniartitsinermi peqataanissaannut soqutiginninnersut.