Services

Sermersuumi suliffissaqartitsinermut politikki nutaaq

Inuusuttut suliffissaaleqinerat akiorneqassaaq, suliffissaaleqisut piginnaanngorsarneqassapput, suliffissat initunerusunngorlugit inissinneqassapput aamma suliffeqarfinnut attaveqarnerit nukittorsarneqassapput. Suliffissaqartitsinermut politikkimi, Kommuneqarfik Sermersuumi Kommunalbestyrelsimit akuerineqaqqammertumi taakku immikkoortutut pingaarnertut inissinneqarput. 

Inuusuttut suliffissaaleqisut siusissukkut iliuusissat, inuusuttut ilinniarnissaannut, taamaalillunilu meeqqat atuarfianni atuareernerminni uniinnartannginnissaannut kajumissaariffiusut aqqutigalugit ikilisinneqassapput. Siusissukkut iliuuseqarnerit inuusuttunut attaveqarsimasut, soorlu inuusuttunut siunnersuisartut, ilinniartitsisut angajoqqaallu tamaasa suleqatigalugit ingerlanneqartassapput.

”Inuussutissarsiornermi sulisussat amigaatigineqarput. Taamaakkaluartoq ukiut tamaasa inuusuttut ilinniarnerminnik sulinerminnillu taamaatitsiinnartartut misigisarpagut. Taamaattoqarnera inuusuttunut inuiaqatigiinnullu alianarpoq, taamaattumillu ajorartorsiutip taassuma iluarsiiffiginiarnissaa pingaaruteqarpoq”, Atugarissaarnermut Suliffeqarnermullu Ataatsimiititaliami siulittaasoq Inge Olsvig Brandt oqarpoq.

Aamma inersimasunik suliffissaaleqisunik ilinniartitsineq piginnaanngorsaanerlu suliffeqarnermut politikkimi suliniuteqarfissat ilagaat. Politikkimi siunissami suliffissaaleqisut piginnaanngorsarneqarnissaat, taamaalillutillu atorfinni sulisitsisuniit inuttalersuinermi ajornakusoortitsiffiusuni sulilernissamut piareersarneqarnissaat siunnerfigineqarpoq.

”Suliffissaaleqisut piginnaanngorsarnerisigut pitsaanerusunik suliffeqalernissamut immaqalu qaffasinnerusunik akissarsiaqalernissamut ikiorsinnaavagut, tamatumalu peqatigisaanik suliffeqarfiit sulisussaaleqisut ikiorsinnaallugit”, Inge Olsvig Brandt oqarpoq.

Piginnaanngorsaanikkut tapersersuinikkullu inuit, ullumikkut suliffeqanngitsut suliffeqalernissamut ikiorserneqarsinnaapput. Kommuni nunatsinni suliffeqarfiit annersaasa ilaattut inunnik, immikkut ittunik unammilligassaqartunik atorfinitsitsisarnermi salliorusuppoq-

Avataaniit atorfinitsinneqartartunut tunngatillugu suliffeqarnermut politikkimi atorfiit nunaqavissunik inuttalerneqarnissaat siunertaralugu suli annertuunik suliniuteqartoqassaaq.