Kulturimik isumassarsiorfik taaguumminut naleqqunnerusinnaanngilaq, Paamiuni kulturimut tunngasunik workshop ingerlanneqarmat uaajeerneq (kiinarpaqarluni qitik) aamma qullermik ikitsineq sammineqarmata. Aaqqissuisumit taaneqarpoq ”Tunissut annertooq, tamatsinnut tunniussaq”
Kuluk Helms aamma Malu Lynge uaajeerput aamma qulleq pillugu Atuarfik Tuiisami isumassarsiortitsisoqarpoq Kommuneqarfik Sermersuup Kulturimik isumassarsiorfianut atatillugu. Workshoppertitsinermi meeqqat qassinilluunniit ukiullit kalaallit kulturiat qanimut pinnguarnerminni iluatsittumik misigisaqarfigilluarpaat.
Meeqqat qulliup sunaanera paasisaqarfigaat, sumut atortarnera, namminnerlu “iperassat”, issuaasat, iperassatut atugassat assalittarlugit misilippaat. Amerlasuunit tupaallaatigineqarpoq ukallit anai panertut iperassatut atorneqarsinnaanerat.
Uaajeerneq pillugu workshopertitsinermi uajeerneq tunngavigalugu kulturi paasisaqarfigineqarpoq, assigiinngitsunik misiliititsisoqarpoq aammalu uaajeernermi kiinnamik qalipaatitsisoqarluni. Naggataagut uaajeernermi meeqqat imminnut ilinniartitsisuminnullu kiinnamikkut qalipassimallutik tupatseqattaarput qiimallutik nilliallutillu.
“Tunissut annertuujuvoq, tamatsinnut tunniussaq, kulturerpat taamatut qanimut misigisinnaallugu. Meeqqat uaajeernermi kiffaanngissuseqarnermik ersersitsisut malugilluarsinnaavakka. Tamanna misigalugu nuanneqaaq” Kuluk Helms oqarpoq, aaqqissuussamik Malu Lynge peqatigalugu katiterisoq.
