Innuttaasunut

Borgmesteri: Qujanaq nersornaasigaasullu pilluaqquagut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Arfininngornermi oktobarip 22-anni Maligassiuisut Show 2022-p ingerlanneqarnerani Sermersuumi innuttaasut arlallit nersornaaserneqarput. Tamanna borgmesterip Avaaraq Olsenip nuannaarutigaa.

Timersornikkut peqqinnissamullu immikkut maluginiarnartumik iliuuseqarsimasunut inunnut kattuffinnullu nersorinnissutinik Katuami Hans Lyngep inersuani arfininngornermi unnukkut agguaassisoqarpoq. Nersorneqartut sisamat Kommuneqarfik Sermersuumeersuupput.

”Nersorneqartut tamakkerlugit qutsavigerusuppakka pilluaqqullugillu, pingaartumik kommunitsinneersut, timersornermili suliniuteqartut tamakkerlugit qutsavigerujussuarpakka. Nersorneqartut pikkorinnersiukkaneersuullutillu timersornermi siammasissuneersuupput. Nunat tamalaat akornanni unammisartuniit atuarfiit ilaanni ilinniartitsisunut. Tamatuma takutiinnarpaa, kommunitsinni timersorneq aallulluarneqartoq. Nersorneqartut tamatsinnut maligassiuisuupput, meerartatsinnuinnaanngitsoq aammali uagutsinnut inersimasuusunut”, borgmesteri Avaaraq Olsen oqarpoq.

Nersorneqartut Sermersuumeersut tassaapput:

Ukaleq Slettemark NSP/Nuuk Biathlonimeersoq, timersullammattut toqqarneqarpoq, pikkorivissunilu takutitsilluarnerpaatut nersorneqarluni. Sisorarluni ooqattaasarluni angusarissaarnerpassui pissutigalugit nersorneqarpoq. Nunat tamalaat akornanni inuusuttut pissartanngorniunneranni 2021-mi aamma Norge-mi pissartanngorniunnerni pissartanngorpoq, IBU-mik arpannermi arlaleriarluni peqataasimavoq, minnerunngitsumillu Kinami Ukiuunerani Olympiadertoqarnerani peqataanikuulluni.

Jan Erik Pedersen Pisoqatigiissitsisarnermik taallugu ”Gå væk kræft”-imik pilersitsisoq Aalasa nersornaammik nersorneqarpoq. Nersornaat Aalasa Kalaallit Nunaanni Timersoqatigiiffiit Kattuffiata suliniutitut takorluugaanut Kalaallit Nunaat ”Nunarsuarmi timimik aalatitsinerpaamut” ikorfartuilluartumut tunniunneqartarpoq.

”Jan Erik Pedersen ulluinnarni ulapaarfiusumi innuttaasut amerlanerpaat peqataaffigisinnaasaannik timimik aalanerulersitsinissamik qasujaalluni suliniuteqarnermigut aqqutissiueqataasarpoq, Jan Erik aalanissamik periarfissat tamaasa aqqutigalugit kikkunnilluunniit ataatsimuulersitsisarnera”, tunngavilersuutigineqarpoq.

Atuarfik Hans Lynge Ukioq manna ataatsimoorfimmi eqeersimaartitsinermut nersornaammik tunineqarpoq. ”Atuarfik Hans Lynge nuannaarnermik, ataatsimoornermik peqqinnermillu pilersitsisarpoq. Eqeersimaartumik isumaqarluartumillu peqatigiinnissaq pineqarpoq, taamaaliornissamullu akisusariaqanngilaq ajornakusoortuusariaqaranilu. Atuarfik Hans Lyngemi aalanikkut ataatsimoorneq pilersinneqartartoq takutinneqartarpoq”, tunngavilersuutigineqarpoq. 

Line Poulsen Nuummi Eqaarsaartartuneersoq, ukiumi aqutsisuullammanngorpoq. Qiimasuuvoq, nutaaliullaqqissuuvoq, aalajaatsuuvoq, ataatsimoortitsillaqqissuuvoq suleqatigiissitsillaqqissuullunilu:

”Line nutaaliullaqqissuunermigut, ajunngitsussarsiortuunermigut peqatigiiffimmillu aqutseriaatsimigut, peqatigiiffik nuannersumik ataatsimoorfiutippaa. Inuusuttut sungiusaasunut ikiuuttalertinniarlugit siuttuuvoq, eqaarsaartitsisarnerullu sineriammut siammartinniarlugu sukataartuulluni”.