Kalaallit Nunaanni illoqarfinnit allaneersut unammersuaqatigissallugit, Nuussuup atuarfiarmiut 9.klassit Historiedystenimi unammersuaarnissamut anngupput. Ukioq mannalu Historiedystenimi Niels Bohr qulequtarineqarpoq.
Historiedysten 2022 Naalagaaffeqatigiinnut tamanut atuuppoq, taamaattumik aamma 8.-10. klassit nunatsinneersut peqataasinnaallutik. Iligiikkaarlutik unamminermut Danmarkimut atuaqatigiillutik angalanissaminnut unammersuaarutigaat. Taamaasillutillu Nuussuup atuarfianeersut 9.A-t ajugaanniuutivinnissamut anngullutik.
”Tulluusimaarutigeqaarput. Nuussuup atuarfiata oqaluttuarisaanerani aatsaavissuaq, oqaluttuarisaanermi unammersuaarnermut peqataalluta unammersuaarnermut anngukkatta.” Taamak oqarpoq Nuussuup atuarfiani atuarfeqarnermut siunnersorti Sofie Heilmann Heskiassen.
Kalaallit Nunaanniit klassit peqataasut unammersuaarutaat tassaavoq Niels Bohr – Atomi pillugu ilisimatoorsuaq.
Siullermeertoqarmat 9.A-t tamatigoortumik – toqqagassinneqarlutik apeqqummik eqqoriaapput, maannalu unammersuarnermut anngullutik, taakkunani unammissallugit klassit allat marluk nunatsinni kommuninit marlunneersut.
Aappassaaneertoqarnerani tassa ajugaanniuutivinnermi, atuartut tunngaviusumik suliakkerneqarput tassani isumassarsiorsinnaaneq atorlugu suliaqartinneqassallutik. Ilaatigut nuannannermik Niels Bohr-ip 1922-mi Nobelpris-innannerani aaqqissuussaliorlutik, aammalu Niels Bohr-ip ammasuunissamik politikkata paasititsissutigineqarnissaannik aaqqissuussaqarlutik.
”Qilanaaqaagut, soorunalumi aamma Nuussuup atuarfianersut ajugaanissaat neriuutigeqaarput” Taamak oqarpoq klassip ilinniartitsisua Aviaq Holm.
Oqaluttuarisaanermik unammersuaartitsineq Nationalhistoriske Museum Frederiksborg-imiittumik aaqqissuuneqarpoq.