Services

Tasiilami innuttaasunik ikiuineq

Borgmesteri Avaaraq Olsen sapaatip akunnerata naanerani Piterarneranit aserorternerit attortisimassutigai kisiannili innuttaasunik sakkortuumik ajoqusertoqannginnera nuannaarutigalugu.

”Ernumaqalunga anorersuaq malinnaaffigaara, kisiannili kommunimi sulisunit innuttaasunut pisariaqartitsisunut ornigullutik annaassiniarsimanerminnik paasissutissiinerpassuit toqqissisimanarsimapput” Borgmesteri Avaaq Olsen oqaluttuarpoq.

Kommunimi sulisut suli anorersuup kinguneranik ajoqusernernik killiffissiuipput, massakkullu illoqarfimmi piffinni arlalinni utaqqiisaasumik aaqqiissuteqareerlutik.

”Innuttaasut illui annertuumik ajoqusersimapput amerlasuullu umiatsiatik annaavaat. Aningaasarsiutitik inuussutigisatillu. Maannakkut Røde Korsi 100.000 koruuninik ikiorsiinermut suliniutinut neqerooruteqareerpoq, pinngortitamilu ajunaarnersuaq taama annertutigimmat, nalaataqartut toqqaannaq ikiorumallugit Naalakkersuisut Aningaasanut inatsimmi ajunaarnersuarnut aningaasanit aningaasaleeqqullugit qinnuigaakka.”

”Anorersuarnerani inunnik ajoqusertoqarsimannginneranik paasitinneqarama oqiliallaqaanga. Ajunaarnersuarni taama ittuni kinguneratigut ajoqusersinnaasut pisataannaanngillat. Innuttaasunit arlalinnit Piterarnerata nalaani annilaangasimasunit toqqissisimasimanngitsunillu tusagaqarpunga. Tamanna uannut sunniuteqangaatsiarpoq taamaattumik innuttaasut naapinnissaannut ataatsimoorlutillu misigisaminnik sakkortuunik eqqartueqatigiissinnaanissaannut periarfissiisumik aaqqissuussaqarpugut,” Borgmesteri Avaaraq Olsen oqaluttuarpoq.

Ataasinngornermi ulloq 26. septembari nal. 19.00 katersortarfimmi naapinnissaq aaqqissuunneqarpoq. Tassani Tasiilami innuttaasut ataatsimoorlutik pisunik eqqartueqatigiissinnaanissamut periarfissaqassapput, kisiannili aamma anorersuup kingorna ataatsimut isigalugu killiffik pillugu kommunimiillu ikiorsiissutaasinnaasut pillugit tusagaqarsinnaassallutik.

”Pisariaqartitsisunut tamanut siunnersuutigerusuppara katersortarfiliaqqullugit. Innuttaasullu ikioqatigiissimasut tamaasa kommunimilu sulisut anorersuarnerani kinguneranilu annertuumik suliniuteqarsimasut qutsavigerusuppakka,” Avaaraq Olsen naggasiivoq.