Services

Sermersuumi nipilersornermik ilinniarfimmi kikkulluunniit tikilluaqqusaapput

Sermersuumi nipilersornermik ilinniarfik Nuummiittoq, isaariaata iigaa eqqumiitsuliortumit Nicholas R. Rosing-Petersenimit qalipanneqarpoq. ”Ersissinniakkanni pingaarnerpaaq tassaavoq, Kalaallit Nunaanni ineriartortoqarnerani tamatiguussuseq. Nunatsinni siunissamut aammalu qanga pisimasunut ammariartornerput”, eqqumiitsuliortoq oqarpoq.

 “Isaariatsinni iigaq ilusilersukkamik qalipatsinneqarnissaa sivisuumik eqqarsaatigisimavarput, Kalaallit Nunaanni nipilersornerup oqaluttuassartaa qalipakkap takutinniartussaavaa. Tamanna pillugu eqqumiitsuliortoq Nicholas R. Rosing-Petersen oqaloqatigisimavarput, qaliapagaq sunik imaqarsinnaanera pillugu, kissaateqaraluarlutalu Nicholassi eqqumiitsuliortutut kiffaanngisuseqarnera inissaqartinneqarnissaa aamma pingaartissimavarput”, Sermersuumi nipilersornermik ilinniarfimmi Nuummi aqutsisoq Pipaluk Lynge Berthelsen tunngavilersuivoq.

Kalaallit nipilersortartut amerlapput, nipilersoriaatsillu assigiinngitsorpassuit atorneqartarlutik. Nipilersornerup tamatigoornera inuiaqatigiittut inissisimanitsinnut tarrarsuutaavoq. Eqqumiitsuliortoq Nicholas R. Rosing-Petersen nammineerluni nipilersuutinik atuisarput, nipilersornerlu inuuneranut ilaalluinnarmat, suliakkerneqarnermini akuersinissi nangaassutigisimanngilaa.

“Qalipakkap imarisaani pingaarnerpaaq tassaavoq kalaalerpalussuseq takussusernissaa, tamanna uannut unammillernalaarsimavoq, tassami annoraaq, kalaallisuut, ulut, nannut qaannallu atunngikkaluarlugit tamanna qanoq takussusersinnaanerlugu eqqarsaatigisimagakku. Takussutissat qalipakkamut ilanngussimasakka tassaapput uanga nammineerlunga kalaaliorpalussutsit misigisartakkakka, kulturip tungaatigut – tassani nipilersorneq ilaalluni, pissanganartumik ingerlanerani niaqormioralugu qalipaavunga”, Nicholas R. Rosing-Petersen nassuiaavoq.

Nipilersornermik ilinniarfimmiit qalipakkamut naammagisimaarinnittoqarpoq, tassani nipilersuutit assigiinngitsut takutinneqarmata. Nipilersuutillu takutinneqartut amerlanerpaartaat nipilersornermik ilinniarfimmi ilinniarneqarsinnaapput. Nipilersornermut ilinniarfiup illuani iseraanni nalornissutigineqarsinnaanngilaq illumut sumut isernerluni.

“Qalipakkap takutippaa inuit ukioqatigiiaat assigiinngitsuneersut, meeqqaniit inersimasunut aamma nipilersoraatsit assigiinngitsut kalaallit nipilersortarnerannut takussusisuut, operartartumiit rockertartunut, nipilersuutit qangarnisaaniit qilaammut. Taamaasilluni qalipakkap takutippaa kikkut tamarmik inissaqartinneqartut”, Pipaluk Lynge Berthelsen oqarpoq.

Qalipakkami Nuup ilisarnaataasa ilaat, tassa qaqqaq Ukkusissaq aamma Nuuk Center takuneqarsinnaapput. Nipilersortartut qalipakkamiittut Nipilersornermut ilinniarfiliartut takuneqarsinnaavoq. Kalaallit nipilersortarnerannut ilisimasaqalaarnerit immaqa assimi ilisarisinnaasaqassajunnarsisut?

Eqqumiitsuliortoq Nicholas R. Rosing-Petersen